కోడెల నుంచి అచ్చెన్నదాకా.. వైసీపీ ఏం సాధించింది.!

రాజకీయాల్లో ఆరోపణలు సర్వసాధారణం. కక్ష సాధింపు చర్యలు కూడా అంతే. ఎవరు అధికారంలో వున్నా ప్రత్యర్థులపై కక్ష సాధింపు చర్యలు మామూలే. అధికారంలోకి రావడమెందుకు.? అంటే, ప్రత్యర్థుల మీద రాజకీయ దాడి చేయడానికే అన్నట్లు తయారయ్యింది తప్ప.. ప్రజలేమనుకుంటున్నారని మాత్రం ప్రధాన రాజకీయ పార్టీలు ఆలోచించడంలేదు. ప్రతిసారీ కొండని తవ్వుతున్నారు.. ఎలుకని కూడాపట్టుకోలేకపోతున్నారు. ఎందుకిలా.?

‘బట్టకాల్చి మొహాన వేయడం’ అనేది రాజకీయ పార్టీలు చేయొచ్చుగాక.. అదీ రాజకీయమే అనుకోవచ్చు. కానీ, ప్రభుత్వాలే ఆ పని చేస్తే.! ఆంధ్రప్రదేశ్‌ మాజీ అసెంబ్లీ స్పీకర్‌ కోడెల శివప్రసాద్‌ ఎందుకు బలవన్మరణానికి పాల్పడ్డారన్నది ఓపెన్‌ సీక్రెట్‌. రాజకీయ వేధింపులు తాళలేక ఆయన బలవన్మరణానికి పాల్పడ్డారు. మొత్తం రాజకీయ వ్యవస్థ సిగ్గుపడాల్సిన సందర్భమది. అధికార పక్షం, ప్రతిపక్షం.. ఇందుకు మినహాయింపు కాదు.

టీడీపీ నిర్లక్ష్యం చేసింది.. వైసీపీ కక్ష సాధింపు చర్యలకు దిగింది. ఈ దుస్థితి రేప్పొద్దున్న ఏ రాజకీయ నాయకుడికైనా రావొచ్చు. కానీ, ఇంగితం లేకుండా వ్యవహరిస్తున్నాయి రాజకీయ పార్టీలు.

తాజాగా, మాజీ మంత్రి అచ్చెన్నాయుడిపై అధికార వైఎస్సార్సీపీ ఆరోపణలు షురూ చేసింది. ఈఎస్‌ఐ మందుల కుంభకోణమట. ఏ ప్రభుత్వంలో అయినా అవినీతి జరగలేదు.. అని ఎవరూ అనరు. ఎందుకంటే, వ్యవస్థ మొత్తం అవినీతిలో కూరుకుపోయింది. కానీ, ఆ అవినీతిని వెలికి తీయడం ఎలా.? అవినీతి బయటకు రాదు.. కానీ, రాజకీయ బురద మాత్రం రాజ్యమేలుతుంది.

కోడెల శివప్రసాద్‌ వ్యవహారం తర్వాత, అమరావతి.. ఆ తర్వాత ఇంకోటి.. ఇప్పుడేమో, అచ్చెన్నాయుడి వ్యవహారం. ఇంతేనా.? ఇంకేమన్నా వుందా.? అధికారంలో వున్న పార్టీలు ఆరోపణలు చేయకూడదు.. చర్యలు తీసుకోవాలి. దురదృష్టవశాత్తూ ఆరోపణలు చేస్తూ సమస్యను తప్పుదోవ పట్టిస్తున్నారు. కోడెల విషయంలో జరిగిన అవినీతి గురించి ఇప్పుడెవరూ ఎందుకు మాట్లాడటంలేదు.? ఆ ‘కొండ’ని తవ్వి ఏ ఎలుకని పట్టారు.? పార్టీ మారితే వేధింపులుండవ్‌.. అధికారం మారితే.. అవినీతిపరులూ అటూ ఇటూ జారిపోతారు. ఈ రాజకీయం ఇంకెన్నాళ్ళు.?