అబ్జర్వేషన్‌: తెలంగాణలో ఆర్టీసీ సమ్మె ఇంకెన్నాళ్ళు.?

ప్రయాణీకులు నానా కష్టాలూ పడుతున్నారు.. ఒకదాని వెంట ఇంకోటి రోడ్డు ప్రమాదాలు చోటు చేసుకుంటున్నాయి.. అయినా, తెలంగాణలో ఆర్టీసీ సమ్మె ఓ కొలిక్కి రావడంలేదు. ప్రభుత్వం దిగొచ్చే పరిస్థితే కన్పించడంలేదు. రోజులు గడుస్తున్నాయి.. కార్మికులకు జీతాలు అందక విలవిల్లాడుతున్నారు. ప్రత్యామ్నాయ ఏర్పాట్లు.. అంటూనే, ప్రయాణీకుల ప్రాణాల్ని గాలికొదిలేసింది తెలంగాణలో కేసీఆర్‌ ప్రభుత్వం.

వ్యవహారం కోర్టుదాకా వెళ్ళినా అక్కడా ఏమీ తేలని పరిస్థితి. ఆర్టీసీ సమ్మె చట్టవిరుద్ధమా.? చట్టబద్ధమా.? అన్నదానిపై సందిగ్ధతే వీడటంలేదు. ఈలోగా ఆర్టీసీ మరింతగా నష్టాల్లో కూరుకుపోతోంది. తెలంగాణ రాష్ట్ర సాధన కోసం అప్పట్లో ఆర్టీసీ కార్మికులు సమ్మె చేశారంటే.. అది వేరే వ్యవహారం. ఇప్పుడు ఆ స్థాయిలో ఎక్కువ కాలంలో సమ్మె చేసే పరిస్థితి వుందా.? అన్నదే మిలియన్‌ డాలర్ల ప్రశ్న.

పలువురు ఆర్టీసీ కార్మికులు బలవన్మరణాలకు పాల్పడుతున్నారు.. మరికొందరు పరిస్థితుల్ని చూసి ఆందోళనతో గుండె ఆగి మరణిస్తున్నారు. అయినా, సమ్మె ఎప్పుడు ముగుస్తుందో తెలియని పరిస్థితి. అసలు ఆర్టీసీ అనేది తెలంగాణలో వుంటుందా.? లేదా.? అనేదాని మీదా క్లారిటీ లేని దుస్థితి.

నిజానికి, సరైన ప్రయాణ సాధనాలు లేక ఇబ్బందులు పడుతున్న ప్రజానీకం, ఆర్టీసీకి మద్దతుగానో.. ప్రభుత్వానికి మద్దతుగానో నినదించాలి. కానీ, ఆ పరిస్థితీ కన్పించడంలేదు. కాస్తో కూస్తో ఆర్టీసీ కార్మికులకే మద్దతుని సాధారణ ప్రజానీకం ప్రకటిస్తున్నా.. అది ‘ఎలివేట్‌’ కావడంలేదని ఆర్టీసీ కార్మికులు వాపోతున్నారు.

మరోపక్క, ప్రజలు ఆర్టీసీ సమ్మెను పూర్తిగా తప్పుపడుతున్నారని ప్రభుత్వం చెబుతోంది. మొత్తానికి ఇద్దరి పంతం ఎన్నో ప్రాణాలు పోవడానికి కారణమయ్యింది. ప్రభుత్వం ఆలోచనలు స్పష్టంగా కన్పిస్తున్నాయి.. ఆర్టీసీ ఇకపై తెలంగాణలో అంతర్ధానమైపోయినట్లే. అద్భుతం జరిగితే తప్ప, ఈ సమ్మె ఆగే పరిస్థితి లేదు. కానీ, ఆ అద్భుతం జరిగేదెలా.?