నగ్న సత్యం: నగ్నంగా మహిళా క్రికెటర్‌ వికెట్‌ కీపింగ్‌

ఓ మహిళా క్రికెటర్‌ వస్త్ర సన్యాసం చేసింది. నగ్నంగా వికెట్‌ కీపింగ్‌ చేసింది. క్రికెట్‌ హిస్టరీలో ఇంతకుముందెప్పుడూ ఇలాంటి ఘటన చోటు చేసుకోలేదు. అయితే, సదరు మహిళా క్రికెటర్‌ నగ్నంగా వికెట్‌ కీపింగ్‌ చేసింది మైదానంలో కాదు, నాలుగ్గోడల మధ్య.. అదీ ఓ ఫొటోసెషన్‌ కోసం మాత్రమే. విషయంలోకి వెళితే, విషయాన్ని అర్థం చేసుకోగలిగితే ఆమె ‘నగ్న’ ప్రయత్నానికి హేట్సాఫ్‌ చెప్తారు ఎవరైనా. ఇంగ్లాండ్‌ మహిళా క్రికెటర్‌ సారా టేలర్‌ తాజాగా సోషల్‌ మీడియాలో ఓ ఫొటో పోస్ట్‌ చేసింది. అందులో ఆమె చేతికి గ్లౌస్‌ వేసుకుని స్టంపింగ్‌ చేస్తూ కన్పించింది. ఆ గ్లౌస్‌ తప్ప, ఆమె శరీరమ్మీద ఎక్కడా ఎలాంటి వస్త్రమూ లేదు.

విశేషమేంటంటే, ఈ ఫొటోలో అసభ్యత కూడా అస్సలేమాత్రం లేకపోవడం. స్త్రీలు ఎదుర్కొంటున్న శారీరక, మానసిక సమస్యల పట్ల అవగాహన పెంచేందుకోసం విమెన్స్‌ హెల్త్‌ యుకె అనే సంస్థతో చేతులు కలిపింది సారా టేలర్‌. అదీ అసలు కథ. అయినా, ఆరోగ్యం పట్ల అవగాహన కల్పించడానికీ, నగ్నంగా కన్పించడానికీ సంబంధమేంటి.? అనే కదా మీ డౌట్‌.! స్త్రీలలో వయసు కారణంగా వచ్చే శారీరక మార్పులు వారిలో మానసిక ఆందోళనలకు ప్రధాన కారణమని చాలా అధ్యయనాలు తేల్చాయి.

సన్నగా వున్నామనో, లావెక్కిపోతున్నామనో ఆందోళనతో మహిళలు అనారోగ్యం బారిన పడుతున్నారు. నల్లగా వున్నా, తెల్లగా వున్నా కష్టమే అన్నట్లుంది కొందరి పరిస్థితి. ఈ నేపథ్యంలోనే సారా టేలర్‌ ఇంతటి నగ్న సాహసం చేయాల్సి వచ్చింది. ‘నేనూ మానసిక సమస్యల్ని ఎదుర్కొన్నాను.. కెరీర్‌కి దూరమయ్యాను. కానీ, మళ్ళీ నిలదొక్కుకున్నాను. మానసిక సమస్యల్ని ఎదుర్కోవడం పెద్ద కష్టమేమీ కాదు’ అని సారా టేలర్‌ అభిప్రాయపడింది. విమర్శల సంగతి పక్కన పెడితే, సారా టేలర్‌ ఇప్పుడు ప్రపంచ వ్యాప్తంగా పాపులర్‌ అయిపోయింది. ఒక్క ఫొటో.. ఆమె రేంజ్‌ని అనూహ్యంగా పెంచేసింది. పబ్లిసిటీ కోసం ఈ పని తాను చేయలేదంటూ సారా టేలర్‌ స్పష్టం చేసిందనుకోండి.. అది వేరే సంగతి.