Janasena: జనసేనకు 75 సీట్లు.! టీడీపీ తాజా అంచనాలివి.!

Janasena: 2‌024 జనసేన పార్టీ ప్రభావమెంతో తెలుగుదేశం పార్టీ అధినేత నారా చంద్రబాబునాయుడికే బాగా తెలసు.! కానీ, జనసేన ప్రభావాన్ని తగ్గించేందుకు తెలుగుదేశం పార్టీ అనుకూల మీడియా శాయశక్తులా పనిచేస్తోంది. రాష్ట్రంలో దాదాపు అన్ని నియోజకవర్గాల్లోనూ జనసేన క్రియాశీలమవుతోంది. గ్రామ స్థాయిలో పార్టీ నిర్మాణం చకచకా జరుగుతోంది. జనసైనికులు, కింది స్థాయిలో బాగా వర్క్ చేస్తున్నారు. అధినేత పవన్ కళ్యాణ్, పార్టీకి ఆర్థిక పరిపుష్టి కలిగించేందుకు సినిమాల్లో నటించక తప్పడంలేదు. తద్వారా సంపాదించిన సంపాదనను పార్టీ వ్యవహారాల కోసం ఖర్చు చేస్తున్నారాయన.

పార్టీ కోసం జనసేన అధినేత చేస్తున్న ఈ ప్రయత్నాల్ని గౌరవిస్తూ, జనసైనికులు.. తమవంతుగా పార్టీ కోసం ఏం చేయాలో.. అంతకు మించి చేసేందుకు ముందుకొస్తున్నారు. మొన్నటి జనసేన పదవ ఆవిర్భావ సభ సందర్భంగా జనసైనికుల్లో రాజకీయ ఉత్సాహం స్పష్టంగా కనిపించింది. తెలుగుదేశం పార్టీ కూడా ఈ కార్యక్రమాన్ని ఆద్యంతం జాగ్రత్తగా పరిశీలించి, విశ్లేషించింది. వచ్చే ఎన్నికల్లో జనసేనతో కలిసి నడవడం తప్ప వేరే దారి లేదన్న నిర్ణయానికి టీడీపీ వచ్చింది. ఉత్తరాంధ్ర పట్టభద్రుల ఎమ్మెల్సీ ఎన్నికల్లో టీడీపీ బలపరచిన అభ్యర్థి విజయం సాధించడంలో కీలక పాత్ర జనసేనదేనని సాక్షాత్తూ టీడీపీ ఎమ్మెల్యే గంటా శ్రీనివాసరావు ప్రకటించిన సంగతి తెలిసిందే.

మరోపక్క, బీజేపీ సైతం టీడీపీ – జనసేన కలయిక తాలూకు ఆవశ్యకతను గుర్తించక తప్పని పరిస్థితి. టీడీపీ అనుకూల మీడియా, టీడీపీ సానుభూతిపరులైన నెటిజన్ల వాదన ఎలా వున్నా, 75 సీట్లలో జనసేనకు అవకాశం ఇవ్వాలనే యోచనలో చంద్రబాబు వున్నట్లు తెలుస్తోంది. ఈ విషయమై ముందు ముందు మరింత స్పష్టత రానుంది. 75, ఆ పైన సీట్లు జనసేనకు గనుక టీడీపీ కేటాయిస్తే, ముఖ్యమంత్రి పదవిని పవన్ కళ్యాణ్‌తో పంచుకునే అవకాశాన్నీ టీడీపీ అధినేత చంద్రబాబు పరిశీలిస్తున్నట్లే భావించాలేమో.!