మధ్యతరగతి కుటుంబం నుంచి సినిమాల్లోకి వచ్చి మెగాస్టార్ అయిన చిరంజీవి.. అందుకు పడ్డ శ్రమ, కష్టం, నటనపై ఉన్న మక్కువ, సినిమాపై ఆసక్తి ప్రధాన కారణం. తెరపై చిరంజీవి మాస్ పవర్ చూసేందుకు ఫ్యాన్సే కాదు ప్రేక్షకులు కూడా ఉత్సాహం చూపేవారు. అలా చిరంజీవిలోని మాస్ కోణాన్ని మరోస్థాయిలో ఆవిష్కరించిన సినిమా ‘రౌడీ అల్లుడు’. ప్రేక్షకుల్ని ఎంటర్ టైన్ చేయడంలో చిరంజీవి దిట్ట. అందుకు ఆయనలో స్వతహాగా ఉన్న కామిక్ టైమింగ్ కూడా ఒక కారణం. రౌడీ అల్లుడులో అదే టైమింగ్ తో సినిమాను బ్లాక్ బస్టర్ చేశారు. అంతకుముందు చిరంజీవి చేసిన దొంగమొగుడు సినిమా తరహాలోనే కథాంశం, స్క్రీన్ ప్లే, డ్యూయల్ రోల్ ఇదే సినిమాలోనూ ఉన్నాయి. అయినా.. రౌడీ అల్లుడు బ్లాక్ బస్టర్ కావడానికి చిరంజీవి ఇమేజ్, చూపిన వైవిధ్యమే కారణం.
ఆటోజానీగా ఊరమాస్ పాత్రలో..
సినిమాలో ఇండస్ట్రీయలిస్ట్ కల్యాణ్, ఆటోజానీ పాత్రల్లో చిరంజీవి నటించారు. ముఖ్యంగా ఆటోజానీగా చిరంజీవి ఊరమాస్ పాత్రలో పరకాయ ప్రవేశం చేశారని చెప్పాలి. ఆయన చేసిన కామెడీకి ధియేటర్లు నవ్వులతో హోరెత్తిపోయాయి. మాసిన గడ్డం, కోర మీసం, బీడీ, ఆటో.. అంటూ చిరంజీవి చాలా ఈజ్ తో పాత్రను పండించారు. కోట శ్రీనివాసరావు, అల్లు రామలింగయ్యలతో కామెడీ ట్రాక్.. విలన్ కెప్టెన్ రాజుతో.. ‘ఒరేయ్.. నువ్వు డబ్బులు బాగా ఇచ్చుకోవాలి’ అంటూ రఫ్పాడేశారని చెప్పాలి. ఇండస్ట్రియలిస్ట్ కల్యాణ్ గా సాఫ్ట్ పాత్రలో.. ఆటోజానీగా ఎంతో వేరియేషన్ చూపారు. ఇంతగా పాత్రలో జీవించాలంటే స్వతహాగా కామెడీ టైమింగ్, మాస్ టైమింగ్ ఉండాల్సిందే. ముఖ్యంగా సినిమాలో ‘బాక్సు బద్దలైపోద్ది’ అనే చిరంజీవి మేనరిజమ్ రాష్ట్రాన్ని ఊపేసింది. ఇన్నేళ్లయినా ఆ డైలాగ్ ఇప్పటికీ హాట్ ఫేవరేట్. హీరోయిన్ దివ్యభారతి గ్లామర్ తో, శోభన నటనతో ఆకట్టుకుంటారు.
కుటుంబం కోసం..
బొంబాయిలో ఆటో ఫైట్ సినిమాకే హైలైట్. ఫైట్స్ లో చిరంజీవి ఎనర్జీని డిఫైన్ చేస్తుంది. సినిమాకు బప్పీలహరి సంగీతం మేజర్ ఎస్సెట్. గ్యాంగ్ లీడర్ తర్వాత రౌడీ అల్లుడులో చార్ట్ బస్టర్ పాటలు ఇవ్వడంతో పాటలన్నీ మోగిపోయాయి. చిలుకా క్షేమమా క్లాస్, బోలో.. బోలో పాట మాస్ బీట్స్ తో అలరిస్తాయి. చిరంజీవి డ్యాన్సులు పాటల్లో బోనస్. సినిమాను ఆయన కుటుంబ సభ్యుల కోసం చేశారు. గీతా ఆర్ట్స్ నిర్మాణంలో అల్లు అరవింద్ సమర్పణలో సాయిరాం ఆర్ట్స్ బ్యానర్ లో డాక్టర్ కె.వెంకటేశ్వరరావు, పంజా ప్రసాద్ నిర్మాతలుగా కె.రాఘవేంద్రరావు దర్శకత్వంలో సినిమా తెరకెక్కించారు. 1991 అక్టోబర్ 18న విడుదలైన రౌడీ అల్లుడు బాక్సాఫీస్ రికార్డులను బద్దలుకొట్టింది. 33 కేంద్రాల్లో శతదినోత్సవం జరుపుకుంది. సినిమా 100 రోజుల వేడుకలను చెన్నైలో ఘనంగా నిర్వహించారు.