‘ఆర్ధిక ఇబ్బందులతో ‘దుల్హన్’ పథకం నిలిపివేసాం..’ హైకోర్టులో ఏపీ ప్రభుత్వం

ఆంధ్రప్రదేశ్ లో పేద ముస్లిం మైనారిటీ యువతులకు పెళ్లి సందర్భంగా ఆర్థికసాయం అందించేందుకు ప్రకటించిన దుల్హన్ పథకం నిలిపివేసినట్లు హైకోర్టుకు రాష్ట్ర ప్రభుత్వం నివేదించింది. ఆర్థిక ఇబ్బందులతో దుల్హన్ పథకం నిలిపివేసినట్లు హైకోర్టుకు వివరణ ఇచ్చింది. గత ప్రభుత్వ హయాంలో దుల్హన్ పథకం ద్వారా ముస్లిం మైనారిటీ యువతులకు వారి వివాహ సమయంలో రూ.50 వేలు ఆర్థికసాయం అందించింది.

ప్రస్తుతం దుల్హన్ పథకం నిలిపివేతను సవాల్ చేస్తూ దాఖలైన పిటిషన్ పై హైకోర్టులో విచారణ జరిగింది. కేసును హైకోర్టు ప్రధాన న్యాయమూర్తి జస్టిస్ ప్రశాంత్ కుమార్ మిశ్రా నేతృత్వంలోని ధర్మాసనం విచారణ చేపట్టింది. ప్రస్తుత ప్రభుత్వ హయాంలో మైనారిటీలకు విదేశీ విద్యా పథకం కూడా అమలు కాలేదని.. గత ప్రభుత్వ హయాంలో 15లక్షల వరకూ సాయం అందేదని అన్నారు. 2018,2019 సంవత్సరాల్లో విదేశీ విద్యా అభ్యసించిన 574 మందికి ఇప్పటికీ సాయం అందలేదని పిటిషనర్ కోర్టుకు విన్నవించారు. దీనిపై కౌంటర్ దాఖలు చేయాలని రాష్ట్ర ప్రభుత్వాన్ని ధర్మాసనం ఆదేశించింది.