మంత్రుల బస్సు యాత్ర.! ఏపీ రోడ్ల మీదేనా.?

‘సామాజిక న్యాయ భేరి’ పేరుతో ఆంధ్రప్రదేశ్ రాష్ట్ర మంత్రులు (బీసీ, ఎస్సీ ఎస్టీ, మైనార్టీ మంత్రులట) బస్సు యాత్ర చేయబోతున్నారు. ఎవరైనా బస్సు యాత్రలో, పాదయాత్రలో చేయొచ్చు. ఇందులో ఎవర్నీ తప్పు పట్టడానికి వీల్లేదు. కాకపోతే, ఆ బస్సు యాత్ర ఆంధ్రప్రదేశ్ రాష్ట్రంలోని రోడ్ల మీదనే కొనసాగుతుందా.? అన్నదే చాలామందికి డౌట్.!

ఆంధ్రప్రదేశ్‌లో రోడ్ల దుస్థితి ఎలా వుందో మొన్న వైసీపీకి అత్యంత సన్నహితంగా వుంటోన్న తెలంగాణ రాష్ట్ర సమితి పార్టీకి చెందిన నేతలు వివరించారు. అంతేనా, ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డికి ‘రాజ గురువు’ లాంటి త్రిదండి రామానుజ చిన జీయర్ స్వామీజీ కూడా సెలవిచ్చారు.

అయినా, ఆంధ్రప్రదేశ్‌లో రోడ్ల దుస్థితి గురించి ఎవరో వచ్చి చెప్పాలా.? ఆ రోడ్ల మీద నిత్య నరకం అనుభవిస్తున్న రాష్ట్ర ప్రజలకు తెలియదా.? వర్షాలు గట్టిగా కురిశాయ్ కాబట్టి, రోడ్లు పాడయ్యాయ్.. వీలైనంత త్వరగా రోడ్లు బాగు చేసేస్తాం.. అని దాదాపు రెండేళ్ళ నుంచీ ఒకే పాట పాడుతోంది అధికార వైసీపీ.

ఇంతకీ, ఇప్పుడు ఆంధ్రప్రదేశ్‌లో రోడ్లు ఎలా వున్నాయ్.? ఏమో, కొంత మెరుగుపడి వుండొచ్చు. లేదా, కాస్త మెరుగు పడిన రోడ్ల మీదనే మంత్రులు బస్సు యాత్రకు ఉపక్రమించి వుండొచ్చు. సామాన్యులేమైపోయినా ఫర్లేదు.. పాలకులకి. ఎందుకంటే, కీలక పదవుల్లో వున్నోళ్ళు రోడ్ల మీద తిరగడం అరుదు.. గాల్లోనే చక్కర్లు కొట్టేస్తుంటారు ఎక్కువగా.!

లేదంటే, ఎక్కడికన్నా వెళ్ళాలనుకుంటే, రాత్రికి రాత్రి ఆ కాస్త మేర రోడ్లు బాగైపోతుంటాయ్. అదే విపక్షాలకు చెందిన నేతలెవరైనా ప్రజల వద్దకు వెళ్ళేందుకు ప్లాన్ చేసుకుంటే, రోడ్ల మరమ్మత్తులంటూ రాత్రికి రాత్రి రోడ్లు తవ్వేసే కార్యక్రమాలూ వుంటాయ్.

కాస్త మెరుగ్గా వున్న రోడ్ల మీద తమ బస్సు యాత్ర సాగేలా, మంత్రులు రోడ్ మ్యాప్ సిద్ధం చేసుకునే వుంటారు. అందుకే, అంత ధైర్యంగా ‘మేం ప్రజల వద్దకు వెళుతున్నాం..’ అని మంత్రులు చెప్పుకోగలుగుతున్నారు. లేదంటే, అంతే సంగతులు.! ఓ నెల రోజులపాటు ఏకధాటిగా ఆంధ్రప్రదేశ్ అంతటా, రాష్ట్రంలోని అన్ని రోడ్ల మీదా మంత్రుల బస్సు యాత్ర సాగితే బావుంటుందేమో.! అప్పుడన్నా రోడ్లు బాగు పడతాయ్.!