వైసీపీ, టీడీపీ.. ఈ కుమ్మక్కు రాజకీయమేంటి చెప్మా.?

పదో తరగతి పరీక్షలకు సంబంధించి ప్రశ్నా పత్రాలు లీక్ అయ్యాయంటూ ఆంధ్రప్రదేశ్‌లో రచ్చ షురూ అయ్యింది. ‘అబ్బే, అది లీక్ కావడం కాదు..’ అంటూ అధికార వైసీపీ బుకాయించింది. ఇంతలోనే, ఈ తతంగం వెనుక తెలుగుదేశం పార్టీ కుట్ర వుందని తేల్చింది. ఒకప్పటి టీడీపీ నేత, మాజీ మంత్రి నారాయణకు చెందిన విద్యా సంస్థల కేంద్రంగా కుట్ర జరిగిందన్నది వైసీపీ ప్రభుత్వ ఆరోపణ. ఈ మేరకు కొందరు అరెస్టయ్యారు కూడా.

ఇదిలా వుంటే, ఇటీవల ముఖ్యమంత్రి వైఎస్ జగన్ ఒంగోలు పర్యటన సందర్భంగా జరిగిన ‘కారు దోపిడీ’ ఘటన ఏ స్థాయి రచ్చకు కారణమయ్యిందో ప్రత్యేకంగా చెప్పాల్సిన పనిలేదు. తిరుపతికి బయల్దేరిన ఓ కుటుంబాన్ని ‘కారు దోపిడీ’ చేశారు ఆర్టీయే అధికారులు. అదేమని ప్రశ్నిస్తే, ‘ఫిట్నెస్ సమస్యలు’ సాకుగా చూపిన అధికారులు, అక్కడితో ఆ కేసుని మమ అనిపించేయాలనుకున్నారు. ఈ ఘటనలో బాధిత కుటుంబం టీడీపీ మద్దతుదారుగా పేర్కొంది అధికార వైసీపీ.

తాజాగా గుంటూరు జిల్లాలో ఓ మహిళపై అత్యాచారం జరిగితే, ఈ కేసులో నిందితులు టీడీపీ క్రియాశీల కార్యకర్తలంటూ అధికార వైసీపీ కొత్త వాదనను తెరపైకి తెచ్చింది. దాంతో, రాజకీయం మరింత వేడెక్కింది.
అసలేం జరుగుతోంది ఆంధ్రప్రదేశ్ రాష్ట్రంలో.! అధికార పార్టీ వైఫల్యాలకు టీడీపీ వంత పాడుతోందా.? లేదంటే, అధికార పార్టీ వైఫల్యాల నుంచి ప్రజల దృష్టి మరల్చేందుకు టీడీపీ తెరపైకొస్తోందా.? వైసీపీ తెరపైకి తెస్తోందా.? టీడీపీనే వైసీపీకి మేలు చేసేందుకు ప్రయత్నిస్తోందా.? కాస్త ఆలోచించాల్సిన విషయమే.

పోలవరం ప్రాజెక్టు ఎప్పుడు పూర్తి చేస్తారయ్యా.? అంటే, చంద్రబాబు పాలనలో అక్రమాలు జరిగాయంటుంది వైసీపీ. అమరావతి ఎప్పుడు పూర్తి చేస్తారంటే, అక్కడ చంద్రబాబు ప్రభుత్వం కుంభకోణానికి పాల్పడింనది వైసీపీ ఆరోపిస్తుంటుంది. ఇద్దరూ ఒకరి మీద ఒకరు నిందలేసుకోవడమేనా.? రాష్ట్రానికి పనికొచ్చే పనులేమైనా జరుగుతాయా.? ఇందుకే మరి 60-40 ఒప్పందాలు ఇరు పార్టీల మధ్యా వున్నాయనేది.