రాజకీయాలన్నాక ఎవరన్నా ఎదగాలనుకుంటారు. కానీ, పతనమైపోవాలనుకోరు. ఒక్కో మెట్టు, ఒక్కో మెట్టు పైకెక్కేందుకు ప్రయత్నిస్తారు. ఇదేమన్నా చాక్లెట్ల పంపకమా.? కాసేపు నువ్వు చీకు.. తర్వాత ఇంకొకరికి.. అనడానికి. ఏం చేస్తాం.! రాజకీయాలు అలాగే తగలడ్డాయ్.
ఆయనో ప్రముఖ రాజకీయ నాయకుడు. రాజకీయాల్లో కష్టపడి ఎదిగినోడు. సరే, రాజకీయాల్లో వివాదాలు మామూలే. ఆరోపణలూ, ప్రత్యారోపణలూ సహజమే. ఆయన మీదా అవినీతి ఆరోపణలున్నాయ్. పదవి విషయంలో ప్రమోషన్ కోసం ఎదురు చూశాడాయన.
పదవి ఇచ్చేటోడు మనోడే కాబట్టి, ప్రమోషన్ పక్కా అని సన్నిహితులతో చెప్పుకున్నాడు. ఆ ప్రమోషన్ వచ్చాకా చేసుకోవల్సిన సంబరాల కోసం టపాకాయలు కూడా పెద్ద ఎత్తున తెచ్చిపెట్టుకున్నాడట. అభిమానుల కోసం ‘పంపకాలు’ కూడా సిద్ధమయ్యాయట.
ఇంతలోనే బ్రేకింగ్ న్యూస్. ప్రమోషన్ లేదు. పీకి పారేశారట.. అనే వార్త రాగానే ఏం చేయాలో పాలుపోక అనుచరులతో గలాటా చేయించాడు. బుజ్జగింపుల పర్వం మొదలైంది. బాబాయ్ – బాత్రూమ్ కథే చెప్పారో.. నిజంగానే బుజ్జగించారో తెలీదు కానీ, సాయంత్రానికి సీను మారిపోయింది.
బెట్టు చేసిన ఆ పెద్దాయన పిల్లి కూనలా మారిపోయాడు. అబ్బే.! బుజ్జగించడానికి కాదు, భోజనం చేయడానికే వచ్చారంటూ దూత రాక గురించి వివరణ ఇచ్చుకున్నాడు. ఇంతలోనే ఎంత మార్పు.?
మారాలి.. మారి తీరాలి. పదవి ఇప్పుడు కాకపోతే ఇంకోసారి రావచ్చు. బాబాయ్ బాత్రూమ్ సీన్ రిపీట్ అయితే ఇంకేమైనా వుందా.? వావ్.! అన్నింటికీ ఒకటే మంత్రం. బాబాయ్ బాత్రూమ్ కథ చెబితే, ఎవ్వడైనా దారిలోకి వచ్చేయాల్సిందే.