రఘురామ హత్యకు కుట్ర జరుగుతోందట.! ఉత్త ఆరోపణేనా.?

యువజన శ్రామిక రైతు కాంగ్రెస్ పార్టీ ఎంపీ రఘురామకృష్ణరాజుకి ప్రాణ హాని వుందట. ‘నా హత్యకు కుట్ర జరుగుతోంది..’ అంటూ స్వయంగా రఘురామకృష్ణరాజు ఆరోపించడం సంచలనంగా మారింది. రాజకీయాల్లో ఇలాంటి ఆరోపణలు సర్వసాధారణం. మొన్నామధ్య ‘వైఎస్ జగన్ హత్యకు కుట్ర జరుగుతోంది..’ అంటూ అధికార వైసీపీ ప్రజా ప్రతినిథులే కొందరు సంచలన ఆరోపణలు చేశారు.

అసలేం జరుగుతోంది ఆంధ్రప్రదేశ్ రాష్ట్రంలో.? రాజకీయాల్లో విమర్శలు సహజమే కావొచ్చుగానీ, మరీ ఇంతలా హత్యారోపణలు చేయడమేంటి.? హత్యకు కుట్ర.. అంటూ అధికార పార్టీ నేతలు వ్యాఖ్యానించడమేంటి.? రఘురామకృష్ణరాజు గత కొంతకాలంగా వైసీపీకి కొరకరాని కొయ్యిలా తయారయ్యారు. ఈ నేపథ్యంలో రఘురామ ఉనికిని వైసీపీ నేతలు కొందరు జీర్ణించుకోలేని పరిస్థితి.

కొన్నాళ్ళ క్రితం రఘురామపై రాజద్రోహం కేసు నమోదయ్యింది. ఆ సమయంలోనే తన హత్యకు కుట్ర జరిగిందని తీవ్రస్థాయిలో ఆరోపణలు చేశారు రఘురామ. రఘురామని అరెస్టు చేయడం, కస్టడీ సమయంలో ఆయన మీద కొందరు దాడి చేశారంటూ ఆరోపణలు రావడం, తన కాలిపై గాయాల్ని రఘురామ అప్పట్లో విచారణ సందర్భంగా న్యాయమూర్తికి చూపించడం.. ఇవన్నీ తెలిసిన విషయాలే.

అసలు రఘురామపై దాడి జరిగిందా.? లేదా.? అన్నదానిపై ఇప్పటికీ ఓ స్పష్టత రాలేదు. కానీ, రఘురామకి గాయాలు అయ్యాయి.. ఆ గాయాలకు మిలిటరీ ఆసుపత్రిలో వైద్య చికిత్స కూడా జరిగింది. చాన్నాళ్ళపాటు ఆయన కాలు కింద పెట్టలేని పరిస్థితి కూడా వచ్చింది.

మళ్ళీ ఇప్పుడు, ఇంకోసారి రఘురామ.. తన హత్యకు కుట్ర జరుగుతోందని ఆరోపించిన దరిమిలా, ఈ వ్యవహారంపై ఆంధ్రప్రదేశ్ ప్రభుత్వం స్పందించాల్సి వుంది. సాక్షాత్తూ తమ ఎంపీ చేస్తున్న ఆరోపణలపై అధికార పార్టీ వివరణ ఇచ్చుకోవాలి. రెబల్ ఎంపీ గనుక దుష్ప్రచారమే చేస్తోంటే చర్యలు తీసుకోవాలి. కానీ, అలాంటివేమీ జరగడంలేదంటే.. కాస్త అనుమానించాల్సిన విషయమే.