ప్రజలకు ఆస్తినిస్తున్నారా.? ప్రభుత్వ ఖజానా నింపుకుంటున్నారా.?

ఓటీఎస్.. అదేనండీ వన్ టైమ్ సెటిల్మెంట్.. ఈ పేరిప్పుడు ఆంధ్రప్రదేశ్ రాజకీయాల్లో హాట్ టాపిక్ అయ్యింది. ‘మేం అధికారంలోకి వస్తే, ఓటీఎస్ ఉచితంగానే చేసిస్తాం..’ అంటోంది తెలుగుదేశం పార్టీ. అధికార వైసీపీ మాత్రం, ‘ఓటీఎస్ స్వచ్ఛందం కాదు..’ అని పైకి చెబుతూనే, తెరవెనుకాల కథ వేరేలా నడిపిస్తోంది.

ఓటీఎస్ చేసుకోకపోతే పెన్షన్లు రావంటూ ఇప్పటికే కింది స్థాయిలో నోటీసులు జారీ అయ్యాయి. ‘తూచ్, అదేదో కొందరు అత్యుత్సాహంతో చేసిన పని..’ అని వైసీపీ ప్రభుత్వం చెబుతోంది. మరోపక్క, పత్రికల్లో ప్రజాధనం దుర్వినియోగం చేస్తూ, ‘ఓటీఎస్’ మీద ప్రకటనలు గుప్పిస్తున్నారు.

గత ప్రభుత్వాలు, వివిధ పేర్లతో పేదలకు గృహాల్ని అందించిన పథకాలకు సంబంధించిన వ్యవహారమిది. మీరుంటోన్న ఇంటిని మీ పేరు మీదనే రిజిస్ట్రేషన్ చేసేస్తామని ప్రభుత్వాలు చెప్పడం కొత్త విషయం కాదు. దానికి ముఖ్యమంత్రి వైఎస్ జగన్ మోహన్ రెడ్డి తాజాగా తన పేరుని జోడించి, కొత్త హంగామా షురూ చేశారంతే.

వైఎస్ జగన్ మోహన్ రెడ్డి పేరుతో ప్రచారంలోకి వచ్చిన ఈ పథకానికి, జనం తమ సొమ్ము చెల్లించి రిజిస్ట్రేషన్ చేయించుకోవడమేంటి.? అన్నది ఓ ప్రశ్న. వన్ టైమ్ సెటిల్మెంట్ ద్వారా ప్రభుత్వం రాయితీ ఇస్తోంది.. అంటున్నారు అధికార పార్టీ నేతలు. మొత్తంగా రాయితీ ఇచ్చేసి, ప్రభుత్వమే ఉచితంగా రిజిస్ట్రేషన్లు చేయించొచ్చుగా.? అన్నది లబ్దిదారుల వాదన.

ఎవరి గోల వారిదే. అసలు ఇలాంటి పథకాలు, వాటికి తమ పేర్లు పెట్టుకోవాలనే ఆలోచన అధికారంలో వున్నవారికి ఎలా వస్తాయో ఏమోగానీ, ప్రభుత్వ ఖజానా నింపుకునే యత్నం తప్ప, ఇందులో పాలకుల చిత్తశుద్ధి ఏమీ కనిపించడంలేదని రాజకీయ విశ్లేషకులు అభిప్రాయపడుతున్నారు.

‘రిజిస్ట్రేషన్ చేయించుకుంటే, మీ ఆస్తి విలువ పెరుగుతుంది. దాన్ని తాకట్టు పెట్టుకుంటే ఎక్కువ డబ్బులొస్తాయి.. మంచి ధరకు అమ్ముకోవచ్చు..’ అని ప్రభుత్వమే చెబుతోంది. ఆస్తుల్ని అమ్మేసుకోమని ప్రభుత్వం సలహాలు ఇవ్వడమేమిటో.? కలికాలమనాలా.? రాజకీయంగా ‘పోయేకాలం’ అనాలా.? అర్థం కాని పరిస్థితి.