కేంద్రం వర్సెస్ ఆంధ్రప్రదేశ్: ఇది రాజద్రోహం కాదా.?

రాజద్రోహమా.? దేశద్రోహమా.? పేరేదైతేనేం.. ఇటీవలి కాలంలో ఈ ‘ద్రోహం’ కేసుల చుట్టూ పెద్ద రచ్చే జరుగుతోంది. రాజులు లేరు, రాచరికాలూ లేవు.. మరి, రాజద్రోహం కేసులెలా పెడతారు.? అన్న ప్రశ్న సర్వోన్నత న్యాయస్థానం ద్వారానే మరింత గట్టిగా తెరపైకొచ్చింది.

వైసీపీ రెబల్ ఎంపీ రఘురామకృష్ణరాజుని ఆ మధ్య రాజద్రోహం కేసులో ఏపీ సీఐడీ అరెస్టు చేశాక ఈ వివాదం మరింతగా ముదిరి పాకాన పడింది. ఇప్పుడు ఆయనే రాజద్రోహం గురించి ఆసక్తికరమైన ప్రశ్నలు సంధిస్తున్నారు. ‘కేంద్రం, దేశాభివృద్ధి కోసం వసూలు చేస్తున్న పన్నుల విషయమై దుష్ప్రచారం చేస్తున్నారు.. ఇదీ నిఖార్సయిన రాజద్రోహం.. దేశద్రోహం..’ అంటూ రఘురామ సంచలన ఆరోపణలు చేశారు.

రఘురామ ఆరోపణల సంగతి పక్కన పెడదాం. కేంద్ర ప్రభుత్వం పెట్రోల్, డీజిల్‌పైన 3,35,000 కోట్ల రూపాయల పన్ను వసూలు చేసినప్పటికీ, అందులో రాష్ట్రాలకు పంచింది కేవలం 19,475 కోట్లు మాత్రమే.. అంటూ ఓ పెద్ద ప్రకటన విడుదల చేసింది వైఎస్ జగన్ సర్కార్.

రాష్ట్రాలకు 41 శాతం వాటా పంపాల్సి వున్నా, కేవలం 5.80 శాతం మాత్రమే ఇచ్చిందన్నది వైఎస్ జగన్ ప్రభుత్వం ఆరోపణ. ఇదేదో రాజకీయ ఆరోపణ మాత్రమే కాదు. రాష్ట్ర ప్రభుత్వం తరఫున పత్రికల్లో వచ్చిన ప్రకటన. చిన్నవిషయం కాదిది. కేంద్రం ఈ వ్యవహారంపై ఇప్పుడు స్పందించి తీరాలి.

రాష్ట్రం తప్పు మాట్లాడుతోందా.? కేంద్రమే తప్పు చేసిందా.? అన్నది తేలాలిప్పుడు. పెట్రో ధరల వ్యవహారం ఎవరికీ అర్థం కాని మిద్యలా తయారైంది. దీనికి కారణం కేంద్ర, రాష్ట్ర ప్రభుత్వాలే. పెట్రో ధరలు పెరిగితే, రాష్ట్రాలకూ ఆదాయం పెరుగుతుంది.. కేంద్రానికి పెరిగే ఆదాయంతోపాటుగా.

అలా రాష్ట్రాలూ ఇప్పటిదాకా పండగ చేసుకున్నాయి, చేసుకుంటూనే వున్నాయి. మరి, కేంద్రాన్ని తప్పు పట్టి, రాష్ట్రాలు చేతులు దులిపేసుకుంటే.. అసలు నిజంగా తప్పు చేస్తున్నదెవరు.?