జనసేనాని శ్రమదానం.. వైసీపీ వెన్నులో వణుకు షురూ..

రాష్ట్రంలో సర్వనాశనమైపోయిన రోడ్ల వ్యవహారానికి సంబంధించి ప్రభుత్వ పెద్దలు మొద్దు నిద్ర వీడటంలేదు. గుంతల రోడ్ల నేపథ్యంలో ప్రజలు ప్రాణాలు కోల్పోతున్నారు.. శాశ్వత అంగవైకల్యానికి గురవుతున్నారు.. ఆర్థికంగా నష్టపోతున్నారు. అయినాగానీ, ప్రభుత్వం గుంతల రోడ్లను బాగు చేయడానికి ససెమిరా అంటోంది.

ఏడాది క్రితమే, రోడ్లను బాగు చేసేందుకు యుద్ధ ప్రాతిపదికన ఏర్పాట్లు.. అంటూ వందల కోట్లు వేల కోట్లు విడుదల చేయనున్నట్లు ప్రకటన చేసిన ప్రభుత్వం, ఇప్పుడేమో ‘వానాకాలం’ సాకులు చెబుతోంది. ఇక, ఈ వ్యవహారంపై జనసేన అధినేత పవన్ కళ్యాణ్ స్వయంగా రంగంలోకి దిగుతున్నారు. అక్టోబర్ 2న శ్రమదానం కార్యక్రమం నిర్వహించబోతున్నారు.

తూర్పుగోదావరి జిల్లా రాజమండ్రిలో, అనంతపురం జిల్లాలోని కొత్తచెరువు ప్రాంతంలో పవన్ శ్రమదానం కార్యక్రమం చేపట్టనున్నట్లు జనసేన పార్టీ ఇలా ప్రకటించిందో లేదో, అలా అధికార పార్టీ వెన్నులో వణుకు షురూ అయ్యింది. నెలల తరబడి రోడ్లను పట్టించుకోని ప్రభుత్వం, రాత్రికి రాత్రి ఆయా రోడ్లను బాగు చేసేందుకు చర్యలు చేపట్టింది. ఆగమేఘాల మీద అనంతపురం జిల్లా కొత్తచెరువులోని రోడ్లను బాగు చేస్తున్నారు. దాంతో, కొత్తచెరువు ప్రజానీకం పవన్ కళ్యాణ్‌కి కృతజ్ఞతలు చెబుతున్నారు.

మరోపక్క, తూర్పుగోదావరి జిల్లా రాజమండ్రిలోని ధవలేశ్వరం బ్యారేజీ రోడ్డుపైన మాత్రం గుంతలు అలాగే వున్నాయి. ఆ గుంతల్ని కూడా వీలైనంత వేగంగా పూడ్చకపోతే.. పరువు పోతుందని స్థానిక వైసీపీ ప్రజా ప్రతినిథులు ప్రభుత్వ పెద్దలని వేడుకుంటున్నారట. పవన్ కదిలితేనేగానీ, పనులు చేయని ప్రభుత్వం.. అన్న చర్చ ఇంకోసారి రాష్ట్రంలో గట్టిగా సాగుతోంది. అయినా, రెండు చోట్లకే పవన్ కళ్యాణ్ శ్రమదానం పరిమితమైతే ఎలా.? కాస్త వీలు చూసుకుని.. పాదయాత్ర లేదా బస్సు యాత్ర లాంటిదేమన్నా రాష్ట్ర వ్యాప్తంగా చేపడితే.. జగన్ సర్కారు.. ఆయా రోడ్లన్నిటినీ రాత్రికి రాత్రి బాగు చేసేస్తుందేమో.?

అయినా, పవన్ కళ్యాణ్ మీద విమర్శలు చేయడం మీద పెట్టే శ్రద్ధలో ఒకటోవంతు శ్రద్ధ అయినా, ప్రజలకు మెరుగైన పాలన అందించడంలో ప్రభుత్వ పెద్దలెందుకు పెడతారు.?