వైసీపీ లెక్కలు తారుమారైపోతున్నాయ్.! ఇదే సాక్ష్యం.!

2024 ఎన్నికల నాటికి వైసీపీ పరిస్థితి ఎలా వుండబోతోంది.? కింది స్థాయిలో పరిస్థితులు ఇప్పుడిప్పుడే వైసీపీ అధిష్టానం అర్థం చేసుకుంటోందనీ, పరిస్థితులు ఇంకా దుర్భరంగా మారకముందే, ముందస్తు ఎన్నికలకు సిద్ధమయ్యేలా ముఖ్యమంత్రి వైఎస్ జగన్ మోహన్ రెడ్డి సన్నాహాలు చేసుకుంటున్నారనీ జరుగుతున్న ప్రచారంలో నిజమెంత.?

ఎవరు ఔనన్నా ఎవరు కాదన్నా.. ఏ అధికార పార్టీ అయినా.. ఎక్కువో.. తక్కువో.. ‘ప్రభుత్వ వ్యతిరేకత’ ఎదుర్కోవాల్సిందే. ఎన్నికల్లో ఇచ్చిన హామీలు నెరవేర్చకపోవడం, అభివృద్ధి జరగకపోవడం.. ఇలా చాలా అంశాలు ‘ప్రభుత్వ వ్యతిరేకత’కు కొలమానాలుగా చెప్పుకోవచ్చు.

ఆంధ్రప్రదేశ్ రాష్ట్రంలో మూడేళ్ళుగా రాజధాని విషయమై గందరగోళం కొనసాగుతోంది. అమరావతిని రాజధానిగా గుర్తించేందుకు అధికార వైసీపీ ఒప్పుకోవడంలేదు. ఈ క్రమంలోనే అమరావతిని, నిజంగానే స్మశానంగా మార్చేసే కుట్రలు పన్నతోంది వైసీపీ.. అన్నది విపక్షాల ఆరోపణ. అందుకు అనుగుణంగానే అమరావతిలో పరిస్థితులు కనిపిస్తున్నాయి.

పోలవరం ప్రాజెక్టు, ప్రత్యేక హోదా, కడప స్టీలు ప్లాంటు, దుగరాజపట్నం పోర్టు.. ఇలాంటివన్నీ, 2019 ఎన్నికల్లో వైసీపీకి అస్త్రాలుగా మారాయి. అవేవీ, ఇప్పటిదాకా కార్యరూపం దాల్చలేదు. సంక్షేమ పథకాల్ని అమలు చేసేశామంటూ, అదే తమ ఘనతగా చెప్పుకుంటోంది వైసీపీ.

ఇంకోపక్క, జనంలోకి వైసీపీ నేతలు వెళ్ళలేకపోతున్నారు. ప్రజా ప్రతినిథులు ఎక్కడికక్కడ ఛీత్కారాలు ఎదుర్కొంటున్నారు. ఈ క్రమంలోనే వైసీపీ ప్రజా ప్రతినిథులు కొందరు, పార్టీ తీరుపై అసహనం వ్యక్తం చేస్తున్నారు. ఇతర పార్టీలతో టచ్‌లోకి కూడా వెళుతున్నారు.

అప్పట్లో టీడీపీ అనుకూల మీడియా ఎలాగైతే టీడీపీని దెద్బతీసిందో, ఇప్పుడు వైసీపీ అనుకూల మీడియా కూడా వైసీపీని అచ్చం అలాగే, అంతకు మించి ముంచేస్తోంది. ఏ నాయకుడు పార్టీ నుంచి జంప్ చేసెయ్యబోతున్నాడో వైసీపీ అనుకూల మీడియానే చెబుతుండడం.. వాస్తవ పరిస్థితికి అద్దం పడుతోంది.

60 శాతానికి పైగా ప్రజా ప్రతినిథులు ఓడిపోతారని వైసీపీ వ్యూహకర్త ప్రశాంత్ కిషోర్ నివేదిక ఇచ్చినట్లుగా గతంలో ప్రచారం జరిగింది. ఇప్పుడైతే, ‘అంతకు మించి’ అనే వాదన వినిపిస్తోంది. ‘మాకు ఎదురే లేదు..’ అని వైసీపీ అంటోంటే, టీడీపీకి 2019 ఎన్నికల్లో వచ్చిన 23 కూడా వైసీపీకి వచ్చేలా లేవ్.. అని కింది స్థాయి పరిణామాలపై కొందరు రాజకీయ విశ్లేషఖులు లెక్కలు చెబుతుండడం గమనార్హం.