రోడ్డున పడ్డ చంద్రన్న.! టీడీపీకి జాకీలేస్తున్న జగనన్న.!

ఎక్కడో ఏదో తేడా కొడుతోందే.! కుప్పంలో అన్నా క్యాంటీన్ కూల్చేయాల్సినంత ఖర్మ అధికార వైఎస్సార్ కాంగ్రెస్ పార్టీకి ఎందుకు పట్టింది.? ప్రతిపక్ష నేత నారా చంద్రబాబునాయుడు తన సొంత నియోజకవర్గంలో పర్యటిస్తోంటే, ఆ కార్యక్రమంలో వైసీపీ నేత ఎందుకు తమ పార్టీ జెండా ఎగరేసినట్లు.?

చాలా ప్రశ్నలున్నాయ్.! తెలుగుదేశం పార్టీ కుప్పం నియోజకవర్గంలో ‘గతించింది’ అన్నది వైసీపీ వాదన.! అదే నిజమైతే, టీడీపీని లైట్ తీసుకోవాలి వైసీపీ. కానీ, అలా చేయడంలేదు. ‘కుప్పంలో గెలిస్తే మంత్రి పదవి..’ అంటూ వైసీపీ శ్రేణులకు, స్వాయానా ముఖ్యమంత్రి వైఎస్ జగన్ మోహన్ రెడ్డి బంపర్ ఆఫర్ ఇస్తున్నారు.. అభ్యర్థిని కూడా ఖరారు చేసేశారు.

ఏం, రాష్ట్రంలో 175 అసెంబ్లీ నియోజకవర్గాల్లో ఎక్కడా లేనిది, కుప్పం నియోజకవర్గానికే ‘మంత్రి పదవి’ ఆఫర్ ఎందుకు వైఎస్ జగన్ స్వయంగా ప్రకటించినట్లు.? అంటే, కుప్పం నియోజకవర్గం విషయమై వైఎస్ జగన్ మోహన్ రెడ్డికి ప్రత్యేకమైన ‘ఇంట్రెస్ట్’ వుందన్నమాట.

సరే, రాజకీయాల్లో గెలుపోటములు సర్వసాధారణం. వైసీపీ గౌరవాధ్యక్షురాలు వైఎస్ విజయమ్మ, విశాఖలో ఓడిపోలేదా.? అన్నట్టు, ఇప్పుడామె వైసీపీలో లేరు, వైసీపీ గౌరవాధ్యక్షురాలు కూడా కాదు. పార్టీ నుంచి తెలివిగా ఆమెను బయటకు పంపేశారు.. అది వేరే కథ.

చంద్రబాబు కుప్పంలో ఓడిపోతే ఏమవుతుంది.? టీడీపీ దారుణంగా దెబ్బ తింటుంది. ఇప్పుడు మాత్రం టీడీపీ ఏమన్నా బలంగా వుందా.? మరెందుకు కుప్పం విషయంలో వైసీపీకి అంత స్పెషల్ ఆసక్తి.? ఎక్కడో ఏదో అనుమానం రేకెత్తుతోంది కదా.? 60-40 ఒప్పందాల్లో భాగంగా టీడీపీకి వైసీపీ జాకీలేస్తున్నట్లే వుంది. లేకపోతే, చంద్రబాబు రోడ్డున పడి ఆందోళన చేసే స్థాయికి రాజకీయాన్ని ఎందుకు వైసీపీ అధినాయకత్వం దిగజార్చినట్లు.?

ప్రతిపక్ష నేత మీద విపరీతమైన సింపతీ కురవాలని బహుశా వైసీపీ కోరుకుందేమో.! అలా చేయడం వల్ల వైసీపీకి లాభమేంటో.?