వైసీపీ సంబరం.. సుజనా చౌదరి బుక్కయిపోయినట్లేనట.!

మాజీ కేంద్ర మంత్రి సుజనా చౌదరి మీద చాలా చాలా ఆరోపణలున్నాయి. అందులో బ్యాంకుల్ని ముంచేశాడన్నది అతి తీవ్రమైన ఆరోపణ. ఈ ఆరోపణల నేపథ్యంలోనే ఆయన మీద గతంలో కేసులు నమోదయ్యాయి.. ఆ కేసులు ఒకింత తీవ్రంగా మారాయి.. ఓ దశలో ఆయన అరెస్టవడం ఖాయమన్న ప్రచారం కూడా జరిగింది. ఈ కేసుల కారణంగానే సుజనా చౌదరి, తెలుగుదేశం పార్టీని వీడి, బీజేపీలో చేరారని వైఎస్సార్సీపీ ఆరోపిస్తోన్న విషయం విదితమే.

అయితే, ‘కేసులు ఆయన వ్యక్తిగతం.. ఆయన బీజేపీలో చేరారు గనుక, ఆ కేసుల నుంచి ఆయనకు ఉపశమనం రాదు..’ అని బీజేపీ ఇప్పటికే క్లారిటీ ఇచ్చింది. అయినాగానీ, రాజకీయాల్లో ‘పార్టీ ఫిరాయింపు’ ఎలాంటి సందర్భాల్లో జరుగుతుందో అందరికీ తెల్సిందే. బీజేపీలో వున్నారు గనుక, సుజనా చౌదరి ప్రస్తుతానికి సేఫ్‌.. ఇందులో ఇంకో మాటకు తావు లేదు. అయితే, సుజనా చౌదరి మీద ఏకంగా రాష్ట్రపతికి ఫిర్యాదు చేసేశారు వైసీపీ ఎంపీ విజయసాయిరెడ్డి.. అక్కడికేదో, తన మీద ఈ తరహా అభియోగాలేమీ లేనట్టు. రాజకీయ వ్యవస్థ ఎంతలా దిగజారిపోయిందో చెప్పడానికి ఇదొక నిదర్శనం. అక్రమాస్తుల కేసులో వైఎస్‌ జగన్‌ ఏ1 నిందితుడు అయితే, విజయసాయిరెడ్డి ఏ2 నిందితుడు.

విజయసాయిరెడ్డి ఫిర్యాదుని రాష్త్రపతి కాస్తా కేంద్ర హోంశాఖకు పంపారట. ఆ హోంశాఖ, సంబంధిత శాఖలకు ఆ విషయాన్ని చేరవేసిందట. దాంతో రేపో మాపో సీబీఐ, ఈడీ.. సుజనా చౌదరి మీద విరుచుకుపడొచ్చట.. ఇదీ వైసీపీ సంబరం. దేశంలో ఈ తరహా కేసుల్లో సీబీఐ, ఈడీ ఎలా పనిచేస్తున్నాయో చూస్తూనే వున్నాం. అయినా, వైసీపీకి.. ప్రత్యక్షంగా వైఎస్‌ జగన్‌, విజయసాయిరెడ్డి ఎగ్జాంపుల్‌గా కన్పిస్తోంటే, సుజనా చౌదరి ఈ కేసులో ఇరుక్కుపోతారని ఆ పార్టీ నేతలు ఎలా అనుకోగలుగుతున్నారు.?

పైగా, సుజనా చౌదరి ఇప్పుడు ఏపీ బీజేపీలో కీలక నేత. టీడీపీకి గండికొట్టే బాధ్యతని బీజేపీ అధిష్టానం సుజనా చౌదరి భుజాల మీద పెట్టిందాయె. అలాంటి సుజనా చౌదరి మీద ఈగ వాలినా బీజేపీ ఊరుకునే పరిస్థితి లేదన్నది నిర్వివాదాంశం.