ఉద్యోగులు బలిసి కొట్టుకుంటున్నారట: ఇదీ బులుగు పైత్యం.!

మొన్నేమో సినీ పరిశ్రమ మీద ‘బలిసి కొట్టుకుంటున్నారు’ అంటూ ఘాటైన విమర్శలు చేశారు. ఇప్పుడేమో, ఉద్యోగుల మీద అదే ‘బలిసి కొట్టుకుంటున్నారు’ అనే పద ప్రయోగం చేసేశారు. ఈ బలిసి కొట్టుకోవడమేంటి.? అసలు ఎవరికి ఇంతలా బలిసిపోయింది.? సినీ పరిశ్రమ కోవిడ్ నేపథ్యంలో ఇబ్బందులు పడుతుండడం, పెద్ద సినిమాలకు కొన్ని రోజులపాటు టిక్కెట్లు పెంచుకునే వెసులుబాటు కల్పించాలని కోరడం, గ్రామీణ ప్రాంతాల్లో తగ్గించిన సినిమా టిక్కెట్ల ధరల్ని పెంచాలనడం.. ఇలాంటి డిమాండ్లు సినీ పరిశ్రమకు చెందిన పలువురు ప్రముఖుల నుంచి వస్తున్న సంగతి తెలిసిందే.

అయితే, ఆంధ్రప్రదేశ్ నుంచి ఆదాయం ఎక్కువ వస్తున్నా, ఆంధ్రప్రదేశ్ ముఖ్యమంత్రిని తెలుగు సినీ పరిశ్రమ గుర్తించడంలేదనీ, బలిసి కొట్టుకుంటున్నారని వైసీపీ ఎమ్మెల్యే నల్లపురెడ్డి ప్రసన్న కుమార్ రెడ్డి చేసిన వ్యాఖ్యలు పెను దుమారం రేపిన సంగతి తెలిసిందే. తాజాగా ఆంధ్రప్రదేశ్ ప్రభుత్వానికి సంబంధించి డిజిటల్ డైరెక్టర్‌గా అధికారిక బాధ్యతల్ని, వైసీపీకి చెందిన సోషల్ మీడియా విభాగానికి ఇన్‌ఛార్జిగా బాధ్యతల్నీ నిర్వహిస్తున్న దేవేంద్రరెడ్డి గుర్రంపాటి, ఉద్యోగుల మీద ‘బలిసి కొట్టుకుంటున్నారు’ అంటూ ట్వీటేశారట… అంతలోనే ఆ ట్వీటుని డిలీట్ చేశారట.‘అదంతా ఫేక్..’ అని వైసీపీ మద్దతుదారులు కొందరు అంటున్నారు. అయితే, ట్వీటేసిన వెంటనే వచ్చిన వ్యతిరేకత నేపథ్యంలో దాన్ని డిలీట్ చేసేశారంటూ సోషల్ మీడియాలో రచ్చ జరుగుతోంది. ఇంతకీ, ఏది నిజం.? ఉద్యోగులు నిజంగానే బలిసి కొట్టుకుంటున్నారా.?

ప్రచారంలో వున్న ట్వీటు సారాంశమేంటంటే, ‘ఉద్యోగులు బలిసి కొట్టుకుంటున్నారు.. పీఆర్సీ లేదు.. హెచ్‌ఆర్ఏ లేదు.. జగనన్నా వీళ్ళందిరీన తీసెయ్యండి. ఇంతకి సగం సాలరీకి చాలామంది దొరుకుతారు..’ అని. జనవరి 20 మధ్యాహ్నం 3.40 నిమిషాలకు ఈ ట్వీటు వేసినట్లుగా చెప్పబడుతోంది.
ఈ ట్వీటులో నిజమెంతోగానీ, చాలామంది వైసీపీ మద్దతుదారుల అభిప్రాయాలు ఉద్యోగుల విషయంలో ఇలాగే వున్నాయ్.! వైసీపీ నేతలు, వైసీపీ కార్యకర్తలు, వైసీపీ సోషల్ మీడియా కార్మికుల తీరుతో ఉద్యోగులు తీవ్ర అసహనం వ్యక్తం చేస్తున్నారు.