వైసీపీ కాపు నేతల్ని తింగరోళ్ళని చేస్తున్న వైఎస్ జగన్.?

ఆయన రవాణా శాఖ మాజీ మంత్రి.! ఆయనకి రవాణా శాఖ నిబంధనలు తెలియవని ఎలా అనుకోగలం.? ఇంకొకాయన ప్రస్తుతం ఐటీ శాఖ మంత్రిగా పనిచేస్తున్నారు. ఆయనకీ, రవాణా శాఖ నిబంధనలు తెలియవాయె. ఒకామె పర్యాటక శాఖ మంత్రి.. పైగా, గతంలో టీడీపీలో వున్నప్పుడు.. అప్పటి టీడీపీ నాయకురాలిగా పచ్చ రంగు వస్త్రాలు ధరించారాయె.! వీళ్ళంతా ఇప్పుడు వాహనాల రంగుల గురించి మాట్లాడుతున్నారు. అదీ, జనసేన ‘వారాహి’ రంగు విషయమై.

ఇదిలా వుంటే, మంత్రి అమర్నాథ్ మీద జనసేన సానుభూతిపరుడు, ప్రముఖ న్యాయవాది కళ్యాణ్ దిలీప్ సుంకర సంచలన వ్యాఖ్యలు చేశారు. కాదు కాదు, వైసీపీలోని కాపు నాయకుల్ని అప్రమత్తం చేస్తున్నారు. జరుగుతున్నదేమిటో వాళ్ళకు విడమర్చి చెప్పేందుకు ప్రయత్నించినట్లుగా కనిపించింది ఆయన తాజాగా విడుదల చేసిన వీడియో చూస్తే.

‘మీకు అర్థమవడంలేదు. మీ అధినేత, మీ పార్టీలోని కాపు నేతల్ని అసమర్థులుగా, చేతకానివాళ్ళుగా చూపించే ప్రయత్నం చేస్తున్నారు..’ అంటూ గుడివాడ అమర్నాథ్, పేర్ని నాని, అంబటి రాంబాబు తదితరులకు ఉచిత సలహా ఇచ్చారు కళ్యాణ్ దిలీప్ సుంకర.

‘రవాణా శాఖ మంత్రిగా పనిచేసిన పేర్ని నానికి, రవాణా శాఖ నిబంధనలు తెలియవు.. జల వనరుల శాఖ మంత్రిగా పనిచేస్తున్న అంబటి రాంబాబుకి పోలవరం ప్రాజెక్టుకి సంబంధించిన కాఫర్ డ్యామ్ అంటే ఏంటో తెలియదు.. ఆ ప్రాజెక్టు ఎప్పుడు పూర్తవుతుందో అసలే తెలియదు.. ఇదీ వైసీపీలో కాపు ప్రజా ప్రతినిథుల తీరు..’ అని కళ్యాణ్ దిలీప్ సుంకర ఎద్దేవా చేశారు.

‘మీ పార్టీకి, మీ ప్రభుత్వానికి మీరు ఏం చేస్తున్నారో తెలుసుకోండి. కాపు సామాజిక వర్గంలో పుట్టి, ఆ సామాజిక వర్గానికి మీ వల్ల మంచి పేరు తీసుకురాలేకపోతున్నారు సరికదా.. మీ అజ్ఞానం కారణంగా అది కాపు సామాజిక వర్గానికి మచ్చగా మారుతోంది..’ అని కళ్యాణ్ దిలీప్ సుంకర ఆవేదన వ్యక్తం చేశారు.

ఐటీ శాఖ గురించి సమీక్షలు చేయకుండా, పవన్ కళ్యాణ్ ‘వారాహి’ వాహనం గురించి మాట్లాడాల్సిన అవసరమేంటి.? అని ప్రశ్నించారాయన. కళ్యాణ్ దిలీప్ సుంకర వ్యాఖ్యల్లోనూ వాస్తవం లేకపోలేదు. తెలంగాణలో రిజిస్ట్రేషన్ అయిన వాహనాన్ని ఏపీలో తిరగనివ్వబోం.. అని అజ్ఞానంతో కూడిన వ్యాఖ్యలు అమర్నాథ్ చేస్తుండడంతో తెలుగు రాష్ట్రాల్లో ప్రజలు ఆయన్ని చూసి నవ్వుకుంటున్నారు.