ఫాఫం.! ‘మూడు’ ఆఫ్ అయ్యిందే.! ఇప్పడెలా.?

మింగడానికి మెతుకుల్లేవ్‌గానీ.. మీసాలకు శంపంగె నూనె కావాలన్నాడట వెనకటికి ఒకడు. ఒక్కదానికి దిక్కు లేదుగానీ, ఆ ఒక్కటీ సాలదు ‘మూడు’ కావాలన్నాడట ఇంకొకడు. ఛత్, ‘మూడు’ వుంటేనేగానీ, ‘మూడ్’ రాదంటూ నానా యాగీ చేస్తే, చివరికి ఏమయ్యింది.? ‘మూడు’ కాస్తా ‘ఆఫ్’ అయ్యింది. ఆ ఒక్కటే దిక్కయ్యింది.

‘మేం మూడు రాజధానులకు కట్టుబడి వున్నాం. అది మా ప్రభుత్వ విధానం..’ అంటూ మంత్రి బొత్స సత్యనారాయణ చెప్పినా, ఇంకొకరు ఇంకెలా అధికార పార్టీ తరఫున మాట్లాడినా.. ఆంధ్రప్రదేశ్ రాష్ట్రానికి మూడు రాజధానులనే వ్యవహారం దాదాపుగా అసాధ్యం.

ఉమ్మడి తెలుగు రాష్ట్రం విభజనకోసం పార్లమెంటులో ప్రవేశపెట్టిన విభజన బిల్లు, అందులోని అంశాల్ని అవగతం చేసుకుంటే, ఆంధ్రప్రదేశ్ రాష్ట్రానికి ఒకే ఒక్క రాజధాని వుండాలి. అది పార్లమెంటు ద్వారా జరిగిన చట్టం. ‘ఎ క్యాపిటల్’ అని అందులో స్పష్టంగా పేర్కొన్నారు. అయినాగానీ, ‘మేం మూడు రాజధానులు చేస్తాం..’ అని ఆంధ్రప్రదేశ్ ప్రభుత్వం యాగీ చేయడం వల్ల ఉపయోగమేంటి.?

రాష్ట్ర హైకోర్టు తాజాగా ఇచ్చిన తీర్పులోనూ ‘ఎ క్యాపిటల్’ అంశం ప్రస్తావనకు వచ్చింది. మూడు రాజధానులు కావాలంటే, పార్లమెంటులో ఆంధ్రప్రదేశ్ పునర్ వ్యవస్థీకరణ చట్టాన్ని సవించాలన్నది హైకోర్టు చెప్పిన మాట. సీఆర్డీయే, రాజధాని కోసం భూములిచ్చిన రైతులకు న్యాయం చేయడం, అమరావతి అభివృద్ధి.. ఇదంతా మళ్ళీ వేరే చర్చ. ఆ విషయాల్లో ప్రభుత్వానికి వేరే దారి లేదు. ఒప్పందాల ప్రకారం అన్నీ జరిగి తీరాల్సిందే.

అయినా, ప్రభుత్వం మారిన ప్రతిసారీ రాజధాని మారిపోవాలంటే, కొత్త రాజధానులు రావాలంటే.. దేశానికి ఎన్ని రాజధానులు అయి వుండేవిప్పుడు.? పరిపాలించేవాళ్ళకి ‘పద్ధతి’ అంటూ ఒకటి ఏడవాలి. తమకు ప్రజలిచ్చిన అధికారాన్ని, మెరుగైన పాలన కోసం ఉపయోగించాలి తప్ప, రాష్ట్రాన్నో దేశాన్నో నాశనం చేయడానికి కాదని అధికారంలో వున్నవాళ్ళు ఎప్పుడు తెలుసుకుంటారో ఏమో.!