తిరుపతి బీజేపీ అభ్యర్థిగా వైఎస్సార్ వీరాభిమాని.!

ఇప్పుడిక అంతా క్లియర్.. వైసీపీ – బీజేపీ మధ్య తెరవెనుకాల ‘అవగాహన’ అందరికీ సుస్పష్టంగా అర్థమయ్యింది. తిరుపతి లోక్‌సభ నియోజకవర్గానికి జరుగుతున్న ఉప ఎన్నిక విషయమై అందరికంటే ముందుగా హడావిడి మొదలు పెట్టిన బీజేపీ అసలు వ్యూహమేంటో తేటతెల్లమయిపోయింది.

‘మేమే తిరుపతిని గెలవబోతున్నాం..’ అని మిగతా పార్టీల కంటే ముందు తిరుపతి వేదికగా ఉప ఎన్నికపై నినదించిన బీజేపీ, ప్రధాన రాజకీయ పార్టీల నుంచి అభ్యర్థులు ఖరారయ్యాక, తీరిగ్గా అభ్యర్థిని ప్రకటించింది. ఆ అభ్యర్థి ఎవరో కాదు మాజీ ఐఏఎస్ రత్నప్రభ. పైగా, ఆమె దివంగత వైఎస్ రాజశేఖర్ రెడ్డికి వీరాభిమాని. వైఎస్ జగన్ మోహన్ రెడ్డి పట్ల అమితమైన అభిమానం ఆమెకు.

‘పదేళ్ళ క్రితం డైనమిక్ సీఎం వైఎస్ రాజశేఖర్ రెడ్డి ఘోర ప్రమాదంలో మృతి చెందారు. పదేళ్ళ తర్వాత ఆయన కుమారుడు ఆంధ్రపదేశ్ ముఖ్యమంత్రి అయ్యారు. ఈ రోజు వైఎస్సార్ ఆత్మకు నిజమైన శాంతి..’ అంటూ వైఎస్ జగన్, 2019 ఎన్నికల్లో గెలిచాక ట్వీటేశారు రత్నప్రభ. ఆ ట్వీట్ ఇప్పుడు వైరల్ అయ్యింది. రాజకీయ నాయకులు పూటకో మాట మార్చడం వింతేమీ కాదు. అయితే, రత్న ప్రభ.. సాధారణ రాజకీయ నాయకురాలు కాదు. ఆమె ఐఏఎస్ అధికారికగా కీలక బాధ్యతలు గతంలో నిర్వహించారు. అందునా వైఎస్సార్ అభిమానిగా ఆమెకు పేరుంది. ఇప్పుడామెను తిరుపతి ఉప ఎన్నిక బరిలోకి దింపి, బీజేపీ ఏం సంకేతాలు పంపాలనుకుంటున్నట్టు.?

బలమైన అభ్యర్థిని నిలబెడతాం.. గెలుస్తాం.. అని చెప్పిన బీజేపీ, వైఎస్సార్ అభిమానిని నిలబెట్టి, తిరుపతి ఉప ఎన్నికలో పరోక్షంగా బీజేపీ, వైసీపీకి సహకరించబోతోందన్నమాట. ఎవరు ఔనన్నా ఎవరు కాదన్నా, ప్రస్తుత ఈక్వేషన్స్ ప్రకారం తిరుపతి ఉప ఎన్నిక ఏకపక్షమే. బీజేపీ వాలకం చూస్తోంటే, వైసీపీ ఆశిస్తోన్న రికార్డు మెజార్టీ, ఆ పార్టీకి ఇప్పించేలానే వుంది.