రమేష్‌ హాస్పిటల్స్‌ ఎపిసోడ్‌: సుప్రీంని ఆశ్రయించనున్న ఏపీ సర్కార్‌

విజయవాడలో ఇటీవల చోటు చేసుకున్న స్వర్ణ ప్యాలెస్‌ అగ్ని ప్రమాద ఘటనకు సంబంధించి ఆ హోటల్‌లో కోవిడ్‌ సెంటర్‌ని నిర్వహించిన రమేష్‌ హాస్పిటల్‌పై కేసులు నమోదు చేసి, పోలీసులు విచారణ చేపడ్తున్న విషయం విదితమే. డాక్టర్‌ రమేష్‌ ఆచూకీ కోసం ప్రయత్నించిన పోలీసులు, ఆయన ఆచూకీ చెబితే లక్ష రూపాయల నజరానా.. అంటూ ప్రకటన కూడా చేశారు.

అయితే, హైకోర్టులో పిటిషన్‌ దాఖలు చేసిన డాక్టర్‌ రమేష్‌, ఈ కేసులో కొంత ఊరట పొందారు. ‘రమేష్‌ ఆసుపత్రి యాజమాన్యం నిర్లక్ష్యం ఎంతుందో.. ఈ ఘటనలో అధికారుల నిర్లక్ష్యం కూడా అంతే వుంది కదా.. మరి, వారిపైనా ఇలాంటి చర్యలే తీసుకుంటారా.?’ అని న్యాయస్థానం ప్రభుత్వాన్ని ప్రశ్నించింది. దాంతో జగన్‌ సర్కార్‌కి గొంతులో పచ్చి వెలక్కాయ పడ్డట్లయ్యింది. ఇక, హైకోర్టు.. డాక్టర్‌ రమేష్‌పై ఎలాంటి తదుపరి చర్యలూ తీసుకోవద్దని ఆదేశాలు జారీ చేసిన దరిమిలా, ఆ ఆదేశాల్ని సవాల్‌ చేస్తూ రాష్ట్ర ప్రభుత్వం సుప్రీంకోర్టును ఆశ్రయించనున్నట్లు తెలుస్తోంది.

‘ఇంకేముంది.. మరో మొట్టికాయ తప్పదేమో..’ అంటూ అప్పుడే వైసీపీ ప్రభుత్వంపై సోషల్‌ మీడియాలో సెటైర్లు పడుతున్నాయి. ఇలాంటి విషయాల్లో నెటిజన్లూ కొంత సంయమనం పాటించాల్సిందే. పై కోర్టును ఆశ్రయించే అవకాశం ఎవరికైనా వుంటుంది. వైఎస్‌ జగన్‌ సర్కార్‌ కూడా తమకున్న అవకాశాల్ని సద్వినియోగం చేసుకోవాలనుకుంటోంది. కానీ, ప్రభుత్వ సలహాదారులే.. లాజిక్‌ లేకుండా ప్రభుత్వానికి సలహాలు ఇస్తున్నట్లు కన్పిస్తోందన్నది రాజకీయ విశ్లేషకుల వాదన.

అదే స్వర్ణ ప్యాలెస్‌లో ప్రభుత్వం కరోనా క్వారంటైన్‌ సెంటర్‌ని నిర్వహించింది. ఆ తర్వాతే అది రమేష్‌ హాస్పిటల్స్‌ కోసం కోవిడ్‌ సెంటర్‌గా మారింది. ఈ క్రమంలో అధికారుల నిర్లక్ష్యం సుస్పష్టం. ఇక్కడ రమేష్‌ హాస్పిటల్స్‌ అక్రమాలపై ఎవరూ సమర్థించే పరిస్థితి వుండదు. కానీ, రమేష్‌ హాస్పిటల్స్‌ యాజమాన్యంపై చర్యలతోపాటు, ప్రభుత్వాధికారులపైనా చర్యలుండాలి కదా.. అన్నదే లాజికల్‌ పాయింట్‌.!