వైఎస్‌ జగన్‌ కూడా ‘సెటిల్‌మెంట్‌’ ముఖ్యమంత్రేనా.?

జర్నలిస్టు మీద దాడికి యత్నించినప్పుడే కోటంరెడ్డిని కంట్రోల్‌ చేయాల్సిన వైసీపీ అధినేత, ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి.. కాస్త తీరిగ్గా స్పందించారు. కోటంరెడ్డి అరెస్ట్‌, బెయిల్‌.. ఇదంతా ఓ ప్రసహనంలా సాగింది. పార్టీ పరువు తీసేసిన కోటంరెడ్డి, కాకానిలను ముఖ్యమంత్రి వైఎస్‌ జగన్‌, అమరావతికి పిలిపించుకున్నారు. వారిద్దరి మధ్యా సయోధ్య కుదర్చాలంటూ పార్టీ ముఖ్య నేతల్ని ఆదేశించారు వైఎస్‌ జగన్‌. ప్రస్తుతం చర్చలు జరుగుతున్నాయి. పలువురు మంత్రులు కూడా ‘డ్యామేజీ కంట్రోల్‌’ కార్యక్రమంలో బిజీగా వున్నారు.

తప్పు చేసిన వ్యక్తిని శిక్షించే స్థాయిలో వున్నప్పటికీ.. వైఎస్‌ జగన్‌ మోహన్‌రెడ్డి, ఎవరి మీదా చర్యలు తీసుకునే పరిస్థితి లేదు. కోటంరెడ్డికి వార్నింగ్‌ ఇస్తే ఇంకేమన్నా వుందా.? అలాగని కాకానికి షాకిస్తే కుదురుతుందా.? అందుకే, ఇప్పుడు వున్నపళంగా ఇద్దరి మధ్యా రాజీ కుదిర్చేయాలి. ఇలాంటి ‘సెటిల్‌మెంట్లు’ చేసే, తెలుగుదేశం పార్టీకి ఘోరీ కట్టేశారు చంద్రబాబు. అదే పని ఇప్పుడు వైఎస్‌ జగన్‌మోహన్‌రెడ్డి కూడా చేస్తున్నారు.

నిజానికి, కోటంరెడ్డి విషయంలో వైఎస్‌ జగన్‌ అస్సలేమాత్రం క్షమించకూడదు. తెలుగుదేశం పార్టీలో చింతమనేని ప్రభాకర్‌ ఏ స్థాయిలో విమర్శలు ఎదుర్కొన్నారో.. కోటంరెడ్డిదీ ఇప్పుడు వైసీపీలో అదే పరిస్థితి. చింతమనేని దెబ్బకి ఎలాగైతే టీడీపీ శ్రేణులే విరక్తి చెందాయో.. కోటంరెడ్డి విషయంలోనూ వైసీపీ శ్రేణులు ఇప్పుడు అలాగే విరక్తి చెందుతున్నాయి.. అదీ వైసీపీ అధికారంలోకి వచ్చిన మూడు నాలుగు నెలల్లోనే.. ఆయన చెలరేగిపోతున్నారు. కానీ, కోటంరెడ్డికి షాకిచ్చేంత శక్తి మాత్రం వైఎస్‌ జగన్‌కి లేదు. అందుకే.. ఈ బుజ్జగింపులని అనుకోవాలేమో.!