గంటా.. పార్టీ మారేది లేదంట.!

నిజానికి, ఏ పార్టీ అధికారంలో వుంటే ఆ పార్టీ వైపుకు వెళ్ళిపోవడం గంటాకు అలవాటు. ఆ క్రమంలోనే ఆయన వైసీపీ వైపుకు జంప్‌ చేస్తున్నారనే ప్రచారం జరిగింది. గంటా తరఫున ఆ ప్రయత్నాలు జరిగినా, వైసీపీ నుంచి ఆయనకు ఆహ్వానం కూడా బలంగానే వున్నా, మంత్రి అవంతి శ్రీనివాస్‌ మాత్రం అడ్డుపుల్ల వేస్తున్నారట. గతంలో గంటా – అవంతి కలిసే పనిచేశారు. అప్పుడు గంటా మంత్రి, అవంతి ఎంపీ. టీడీపీ హయాంలో ఇద్దరూ కలిసే పనిచేశారు.. కలిసే దండుకున్నారంటూ ఆరోపణలున్నాయనుకోండి.. అది వేరే విషయం.

టీడీపీని వీడి జనసేనలోకి వెళ్ళాలని తొలుత ఈ ఇద్దరూ భావించారు. ఆ తర్వాత వైసీపీలోకి వెళ్ళాలనుకున్నారు. చివరి నిమిషంలో గంటా ఆగిపోతే, అవంతి శ్రీనివాస్‌ మాత్రం వైసీపీలోకి వెళ్లిపోయారు. అలా వైసీపీలోకి వెళ్ళడమే అవంతికి కలిసొచ్చిందనుకోండి.. అది వేరే సంగతి. ఇదిలా వుంటే, గంటా శ్రీనివాసరావుని లాగేందుకు బీజేపీ శ్రేణులు ఇంకా ప్రయత్నిస్తూనే వున్నాయి. ఇప్పటికి గంటా టీడీపీని వీడకపోయినా, ముందు ముందు ఆయన వైసీపీలోకో, బీజేపీలోకో.. ఇవేవీ కాదంటే జనసేనలోకో వెళ్ళిపోవడం ఖాయమని.. ఎక్కువ కాలం ఆయన టీడీపీలో కొనసాగలేరని రాజకీయ వర్గాల్లో ప్రచారం జరుగుతోంది.