ఔను, చెత్త రాతలే బులుగు పచ్చ జర్నలిజం.!

‘మేం చెత్త రాతలే రాస్తాం.. పబ్లిక్ లైఫ్‌లో వుంటే ఏమన్నా అంటాం. ఇద్దరి కలిసి కూర్చుని చర్చించుకుంటే, అక్కడేదో జరగకూడనిది జరిగిందనే భావిస్తాం. మేం బురద చల్లుతాం, మీరు కడుక్కోవాల్సిందే. మేం చెత్త వాగుడు వాగకూడదని మీరెలా చెబుతారు.?’ ఇలా సాగుతోంది బులుగు పచ్చ జర్నలిజం.

మెగాస్టార్ చిరంజీవి, ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డితో ఇటీవల భేటీ అవడంపై బులుగు పచ్చ జర్నలిజం షరామామూలుగానే వెకిలితనం ప్రదర్శించింది. ఓ వైపు పచ్చ మీడియా, ఇంకో వైపు బులుగు మీడియా.. ఈ భేటీకి రాజకీయ రంగు పులిమేసింది.

ఎవరూ తక్కువ కాదన్నట్టు.. వైసీపీ నేతలు, టీడీపీ నేతలూ.. జగన్ – చిరంజీవి మధ్య జరిగిన భేటీని జీర్ణించుకోలేకపోయారు. చిరంజీవిని పొగడుతూ పవన్ కళ్యాణ్ మీద విమర్శలు చేయడానికి ఈ భేటీని వైసీపీ నేతలు వాడుకుంటే, చిరంజీవిపై రాజకీయ బురద చల్లేందుకు తెలుగుదేశం పార్టీ విశ్వప్రయత్నాలూ చేసింది.

ముఖ్యమంత్రి వైఎస్ జగన్‌తో తన భేటీని రాజకీయ కోణంలో చూడవద్దంటూ చిరంజీవి ప్రకటన విడుదల చేశాక, బులుగు పచ్చ మీడియా ఒక్కసారిగా ఉలిక్కపడాల్సి వచ్చింది. ‘న్యూస్ రాయండి.. వ్యూస్ ప్రచారం చేయొద్దు..’ అంటూ చిరంజీవి సోషల్ మీడియా వేదికగా చేసిన విజ్ఞప్తి, బులుగు పచ్చ మీడియాకి ఎక్కడో కాలేలా చేసింది.

నిజానికి, బులుగు పచ్చ జర్నలిజం పుణ్యమా అని వార్త ఏనాడో కాలగర్భంలో కలిసిపోయింది. వార్త స్థానంలో పైత్యం వచ్చి పడింది. నచ్చనోడి మీద బురద చల్లడమే ఆ పైత్యం. రాజకీయ పార్టీలు మదమెక్కి జర్నలిజాన్ని తన దొడ్లో కట్టేసుకునే ప్రయత్నం చేయడంతోనే ఈ దుస్థితి అన్నది నిర్వివాదాంశం.

చిరంజీవి మళ్ళీ రాజకీయాల్లోకి వచ్చేది లేదు.. చట్ట సభలకు వెళ్ళేది లేదు.. ఇది ఆయన ఇప్పుడు కొత్తగా చెప్పిన మాట కాదు. పదే పదే చెబుతున్నదే. అయినాగానీ, బులుగు పచ్చ జర్నలిజంకి కళ్ళు లేవు, చెవులూ లేవు. అందుకే, ఈ పచ్చ రాతలు.. బులుగు చేష్టలు.!