కరోనాపై ‘వైసీపీ స్వామీజీ’ జోస్యం.. ఏంటీ పైత్యం.?

ఆయన్ని కొందరు దైవాంశ సంభూతుడిగా భావిస్తారు. కానీ, ఆయనేమో రాజకీయాలు చేస్తారు. అదే మరి.. రాజకీయాలకీ స్వామీజీలకీ వున్న లింకు. తెలంగాణలోని అధికార పార్టీకీ ఈ తరహా లింకులున్నాయి. కానీ, అక్కడి పరిస్థితులు వేరు. ఆంధ్రప్రదేశ్‌లో పరిస్థితి అతి చిత్రమైనవి.

ఆధ్మాత్మిక చింతన పక్కన పడేసి మరీ ఓ ‘పెద్ద స్వామీజీ’ అధికార వైసీపీతో అంటకాగుతుంటారు. గత ఎన్నికల్లో సదరు స్వామీజీ, వైసీపీకి అందించిన సహాయ సహకారాల గురించి ఎంత చెప్పినా తక్కువే. ఇప్పుడు ఆ స్వామీజీ, మే 5 తర్వాత దేశంలో కరోనా వైరస్‌ తగ్గుముఖం పడుతుందని సెలవిచ్చేశారు. ఇప్పుడంతా కష్ట కాలమే నడుస్తోందట.. కాబట్టి, ఇబ్బందులు తప్పవట. అద్గదీ అసలు సంగతి.

మే 5 తర్వాత పరిస్థితులు సద్దుమణుగుతాయని స్వామీజీ చెప్పిన మాటలు నిజమవ్వాలనే ఆశిద్దాం. కానీ, ఇంతటి ఉపద్రవం వచ్చి పడుతుందని సదరు స్వామీజీ, తనకు అత్యంత సన్నిహితుడైన ముఖ్యమంత్రిని ముందే ఎందుకు అప్రమత్తం చేయలేదట.? దేశంలో ఆలయాల మూసివేత ఎప్పుడన్నా జరిగిందా.? చర్చిలు, మసీదులు మూతపడ్డం ఎప్పుడైనా విన్నామా.? అవన్నీ జరుగుతున్నాయి. అలాగని, ఇక్కడ దైవాన్ని నిందించలేం. కానీ, స్వామీజీలు.. భక్తిని క్యాష్‌ చేసుకోవడానికి తప్ప, భక్తుల కోసం ఏమాత్రం ఉపయోగపడే పనులు చేయరనీ, పైగా ఈ పరిస్థితుల్లోనూ మూఢనమ్మకాల్ని వ్యాప్తి చేస్తుంటారనీ ఇదిగో.. ఇలాంటి స్వామీజీల వల్లనే స్పష్టమవుతుంటుంది.

లాక్‌డౌన్‌ని మే 3 వరకూ పొడిగించింది కేంద్ర ప్రభుత్వం. ఈలోగా కరోనా వైరస్‌ పాజిటివ్‌ కేసుల నమోదు తగ్గే అవకాశాలైతే కన్పించడంలేదు. ఓ అంచనా ప్రకారం 6 నుంచి 9 నెలల వరకూ పరిస్థితి ఇలాగే వుండబోతోందట. ఊహించుకుంటేనే పరిస్థితి అత్యంత భయానకంగా అన్పిస్తోంది కదూ.! అగ్ర రాజ్యం అమెరికానే కరోనా దెబ్బకి విలవిల్లాడుతోంది. మొత్తంగా లక్షన్నర మరణాలు ప్రపంచ వ్యాప్తంగా ఇప్పటికే నమోదయ్యాయి కరోనా కారణంగా. ఇంతటి తీవ్రమైన పరిస్థితి నుంచి ఇంకో ఇరవై రోజుల్లో ఉపశమనం వచ్చేస్తుందని స్వామీజీ చెబితే నమ్మగలమా.? ముఖ్యమంత్రి పారాసిటమాల్‌ కథలకీ, స్వామీజీ సోది కబుర్లకీ అలా కుదిరిందంతే.!