జనసేన మహిళా నేత ఇంటిపై దాడి: వైసీపీ ‘కథ’ ఇదీ.!

జనసేన పార్టీకి చెందిన మహిళా నేతపై, జనసేన పార్టీకే చెందిన ఓ వ్యక్తి దాడి చేశాడట. ఇదీ వైసీపీ అల్లుతోన్న కట్టుకథ. ఇదంతా పెద్ద డ్రామా అనీ, ఈ డ్రామాని జనసేన, బీజేపీ కలిసి రక్తికట్టిస్తున్నాయనీ వైసీపీ ఆరోపిస్తోంది. అసలేంటి కథ.? అంటే, శ్రీకాళహస్తి నియోజకవర్గ జనసేన ఇన్‌ఛార్జి నగరం వినుత, రాజకీయంగా చాలా యాక్టివ్‌గా వుంటున్నారు. కరోనా సమయంలో, పేదల్ని ఆదుకునేందుకు చాలా చాలా కార్యక్రమాలు చేపట్టారు వినుత. ఈ క్రమంలో స్థానిక వైసీపీ శ్రేణులు వీలు చిక్కినప్పుడల్లా జనసేనపై దాడులకు యత్నిస్తున్నారు.

నియోజకవర్గంలో వైసీపీకి ధీటుగా జనసేన ఎదుగుతుండడంతో స్థానిక వైసీపీ నాయకత్వం అక్కసు పెంచుకున్నట్లే కనిపిస్తోంది. ఈ క్రమంలోనే వినుత ఇంటిపై కొందరు దుండగులు దాడి చేశారు. ఈ వ్యవహారాన్ని జనసేన అధినేత పవన్‌ కళ్యాణ్‌ సీరియస్‌గా తీసుకున్నారు. ఈ దాడుల్ని ఖండించిన జనసేనాని పవన్‌, అధికార పార్టీ అకృత్యాలకు బెదిరేది లేదని స్పష్టం చేశారు.. వినుత కుటుంబానికి జనసేన అండగా వుంటుందని స్పష్టం చేశారు.

మరోపక్క, జనసేన మిత్రపక్షం బీజేపీ కూడా, ఈ వ్యవహారాన్ని సీరియజ్‌గా తీసుకుంది. ఏపీ బీజేపీ అధ్యక్షుడు సోము వీర్రాజు, వినుత కుటుంబాన్ని పరామర్శించారు. పరిస్థితిని అడిగి తెలుసుకున్నారు. ఇక్కడే, వైసీపీకి ఒళ్ళు మండిపోయింది. తమ బండారం బయటపడుతుందన్న కోణంలో కొత్త కథని తెరపైకి తెచ్చింది.

వినుత అనుచరుల్లో ఒకరైన శివకుమార్‌ ఈ దాడులకు పాల్పడినట్లు వైసీపీ ఆరోపిస్తోంది. చిత్రమేంటంటే, వినుత కుటుంబం గతంలో వైసీపీలో పనిచేశారట.. శివకుమార్‌ కూడా అప్పుడు వైసీపీలోనే వున్నారట.. కరోనా నేపథ్యంలో వినుత కోసం శివకుమార్‌ చాలా ఖర్చు చేశారట జనసేన తరఫున. ఆ వ్యవహారాల్లో తేడాలొచ్చి శివకుమార్‌, వినుత ఇంటిపై దాడి చేశాడని వైసీపీ కొత్త కథని ప్రచారంలోకి తెచ్చింది.

ఈ వ్యవహారంపై జనసేన నేత వినుత తీవ్రంగా స్పందిస్తున్నారు. అధికార పార్టీ కక్షపూరితంగా చేస్తోన్న రాజకీయ దాడులకు కొత్త కథలు అల్లుతోందని మండిపడుతున్నారామె. తిరుపతి ఉప ఎన్నిక త్వరలో జరగనుండగా, శ్రీకాళహస్తి నియోజకవర్గంలో ఈ ఘటన రాజకీయంగా కాక రేపుతోంది.