బీజేపీకి వీర్రాజు ‘పవర్’: పండగ చేస్కుంటున్న వైసీపీ, డీలాపడ్డ టీడీపీ.!

ఊళ్ళో పెళ్ళికి ‘అదేదో’ హడావిడి.. అన్నట్టు, బీజేపీ రాష్ట్ర అధ్యక్షుడిగా సోము వీర్రాజు నియామకంపై సోషల్‌ మీడియాలో వైసీపీ మద్దతుదారులు సంబరాలు చేసుకుంటున్నారు. ఈ వ్యవహారంపై టీడీపీ మద్దతుదారులు పూర్తిగా డీలాపడిపోయారు. నిజానికి, అది బీజేపీ అంతర్గత వ్యవహారం. బీజేపీ – జనసేన మిత్రపక్షాలు గనుక.. జనసేన పార్టీ శ్రేణులు ఈ వ్యవహారంపై స్పందిస్తే అదో లెక్క. కానీ, వైసీపీ అత్యుత్సాహమేమిటిక్కడ.? ‘సోము వీర్రాజుకి చంద్రబాబు అంటే అస్సలు గిట్టదు.. బీజేపీ – టీడీపీ పొత్తు వున్నప్పుడు కూడా సోము వీర్రాజు, చంద్రబాబు ప్రభుత్వంపై దుమ్మెత్తిపోసేవారు.. ఇప్పుడు ఆయనే రాష్ట్ర బీజేపీ అధ్యక్షుడు.. ఇకపై చంద్రబాబుకి మూడినట్లే..’ అన్నది వైసీపీ మద్దతుదారుల వాదన. అది నిజమా.? కాదా.? అన్నది వేరే చర్చ.

సోము వీర్రాజు చాలా చాలా అగ్రెసివ్‌. విమర్శలు చేయాల్సి వస్తే.. ఎవర్నీ ఉపేక్షించరాయన. వైసీపీలోకి వెళ్లాల్సిన కన్నా లక్ష్మినారాయణ, బీజేపీలోకి రావడంతో సోము వీర్రాజుకి అప్పట్లో బీజేపీ రాష్ట్ర అధ్యక్షుడిగా అవకాశం తృటిలో తప్పిపోయిన మాట వాస్తవం. బీజేపీలోకి కన్నా లక్ష్మినారాయణను పంపించిందే వైసీపీ.. అన్న వాదన కూడా అప్పట్లో గట్టిగా విన్పించిందనుకోండి.. అది వేరే విషయం. కన్నా లక్ష్మినారాయణ మీద ‘ప్రో టీడీపీ’ అనే ముద్ర వేసింది కూడా వైసీపీనే.

ఇక, ఇప్పుడు బీజేపీలో అసలు సిసలు ‘కాషాయ సైన్యం’ జూలు విదల్చనుంది. ఈ దెబ్బకి బీజేపీలోని టీడీపీ సానుభూతిపరులు, వైసీపీ సానుభూతిపరులు.. ఇద్దరూ బెంబేలెత్తాల్సిందే. ఎటూ తెలుగుదేశం పార్టీ ప్రతిపక్షం గనుక.. బీజేపీ, టీడీపీని పెద్దగా పట్టించుకోకపోవచ్చు. ఆంధ్రప్రదేశ్‌లో అధికారంలోకి వచ్చేందుకు బీజేపీ చాలా వ్యూహాల్నే రచిస్తోంది. ఈ క్రమంలో తమకు జనసేన ఉపకరిస్తుందన్న భావనతోనే జనసేన పార్టీతో బీజేపీ పొత్తు కుదుర్చుకుంది.

పైగా సోము వీర్రాజు అంటే, జనసేన అధినేత పవన్‌ కళ్యాణ్‌కి అత్యంత ఆప్తుడు. ఈ ఈక్వేషన్స్‌ అన్నీ పరిగణనలోకి తీసుకుంటే రానున్న రోజుల్లో రాష్ట్ర రాజకీయాల్లో ఆసక్తికరమైన మలుపులు చూయడబోతున్నామన్నది నిస్సందేహం. ప్రస్తుతానికి పండగ చేసుకుంటున్న వైసీపీకి ముందు ముందు ఏపీలో బీజేపీ – జనసేన ఇచ్చే షాక్‌ ఓ రేంజ్‌లో వుండబోతోంది. టీడీపీ సంగతంటారా.. ప్రస్తుతానికి ఆ పార్టీకి ఏపీలో అంత సీన్‌ కన్పించడంలేదు.