ఇన్‌సైడ్‌ స్టోరీ: చైనాతో యుద్ధానికి సిద్ధమవుతున్నామా.?

జమ్మూకాశ్మీర్‌లో రెండు నెలలకు సరిపడా వంట గ్యాస్‌ సిలెండర్లను సిద్ధం చేస్తున్నారట. ఇది యుద్ధ సంకేతమేనన్న ప్రచారం జరుగుతోంది. మరోపక్క, కేంద్ర హోంమంత్రిగా బాధ్యతలు నిర్వహిస్తోన్న అమిత్‌ షా, కేంద్ర రక్షణ శాఖ మంత్రిగా కూడా త్వరలో బాధ్యతలు తీసుకోనున్నారంటూ గుసగుసలు విన్పిస్తున్నాయి. మరి, ప్రస్తుత డిఫెన్స్‌ మినిస్టర్‌ రాజ్‌నాథ్‌సింగ్‌ మాటేమిటి.? అంటే, ఆయన్ని వేరే శాఖకు మార్చుతారన్నది సదరు గాసిప్స్‌ సారాంశం. సరిహద్దుల్లో చైనా కదలికలు పెరుగుతున్నాయి. దానికి ధీటుగా భారత సైన్యం కూడా భారీ స్థాయిలోనే మోహరింపులు చేస్తోంది.

ఓ వైపు పాకిస్తాన్‌, ఇంకో వైపు చైనా.. వీటితోపాటే బుసలు కొడుతున్న నేపాల్‌.. వెరసి, పరిస్థితులు కాస్తంత ఇబ్బందికరంగానే మారాయి భారతదేశానికి. పరిస్థితి చూస్తోంటే, ఏ క్షణాన అయినా యుద్ధం మొదలవ్వొచ్చు.. అన్న వాదనలు కొందరు రాజకీయ విశ్లేషకుల నుంచి విన్పిస్తున్నాయి. ‘రెండు యుద్ధాలు చేస్తున్నాం.. ఒకటి కరోనా వైరస్‌తో, ఇంకోటి సరిహద్దుల్లో చైనాతో..’ అంటూ ఇటీవల అమిత్‌ షా వ్యాఖ్యానించారు. అంతేనా, రెండు యుద్ధాల్లోనూ గెలుస్తాం.. అని ధీమా వ్యక్తం చేశారాయన.

ప్రస్తుతం దేశమంతా కరోనా సంక్షోభంలో వుంది. దేశమే కాదు.. ప్రపంచమంతా కరోనా సంక్షోభంలోనే వుంది. ఆ సంక్షోభానికి కారణం చైనానే. ఆ సంగతి తెలిసీ అగ్రరాజ్యం అమెరికానే, చైనాని ఏమీ చేయలేకపోతోంది. ‘భారతదేశానికి అవసరమైతే సైనిక సాయం అందిస్తాం..’ అని అమెరికా, భారతదేశానికి స్నేహ హస్తం అందిస్తున్నా, అమెరికాని అంత తేలిగ్గా నమ్మడానికి వీల్లేదు. భారతదేశానికి నమ్మదగ్గ స్నేహం రష్యా రూపంలో ఎప్పుడూ వుంటుంది. అయితే, రష్యాకి భారతదేశంతోపాటు చైనాతోనూ సన్నిహిత సంబంధాలున్నాయి. ఈ నేపథ్యంలోనే రష్యా కొంతమేర ఇరు దేశాల మధ్యా రాయబారం కూడా నిర్వహిస్తోంది. అయితే, చైనా మాత్రం తన దూకుడుని కొనసాగిస్తోంది.

ఏదిఏమైనా, చైనాతో కావొచ్చు.. మరో దేశంతో కావొచ్చు.. ఇప్పటికిప్పుడు యుద్ధం చేసే పరిస్థితుల్లో లేదు భారతదేశం. అలాగని, శతృవు రెచ్చిపోతోంటే చూస్తూ ఊరుకునే ప్రసక్తీ వుండదనుకోండి.. అది వేరే విషయం. అందుకే, సరిహద్దుల్లో మోహరింపులు పెరిగాయి. కనీ వినీ ఎరుగని స్థాయిలో ముందస్తు యుద్ధ వాతావరణం అయితే సరిహద్దుల్లో కన్పిస్తోంది.