జగన్ చేసింది కేసీఆర్ చేయలేరా?

మనసుంటే మార్గం ఉంటుందనేది నానుడి. ఏ పైనైనా కచ్చితంగా చేయాలని అని సంకల్పించుకుంటే అందుకు ఎలాంటి కారణాలూ అడ్డు రావు. తెలుగు రాష్ట్రాల సీఎంలు తీసుకున్న కొన్ని నిర్ణయాలే ఇందుకు నిదర్శనం. ముందుగా ఏపీ సంగతి చూద్దాం. తెలంగాణ ధనిక రాష్ట్రం కాగా, ఏపీ అప్పుల్లో కూరుకుపోయి విలవిలలాడుతోంది. ప్రతినెలా ఉద్యోగుల జీతభత్యాలు, పింఛన్లకే ఇబ్బందులు పడుతోంది. ప్రతినెలా లోటు బడ్జెటే. అయినప్పటికీ పాదయాత్ర సందర్బంగా తాను ఇచ్చిన హామీలను అమలు చేయాలనే సంకల్పంతో ఏపీ సీఎం వైఎస్ జగన్ మోహన్ రెడ్డి ముందుకు కదులుతున్నారు.

అధికారంలోకి వచ్చిన మూడు నెలల్లోనే ఆర్టీసీని ప్రభుత్వంలో విలీనం చేశారు. వాస్తవానికి ఆర్టీసీని ప్రభుత్వంలో విలీనం చేయాలంటే కేంద్ర ప్రభుత్వ అనుమతి అవసరం. ఇందుకు చాలా పెద్ద తతంగమే ఉంది. ఆ సాకూ చూపించి జగన్ తప్పించుకునే వీలుంది. కానీ ఆయన అలా చేయలేదు. ముందుగా ఆర్టీసీ సిబ్బందిని ప్రభుత్వంలో విలీనం చేశారు. అంటే.. ప్రభుత్వ ఉద్యోగికి ఉన్న సకల సౌకర్యాలూ వారికి వర్తింపజేశారు. ఆర్టీసీని ఎప్పటిలాగానే కొనసాగించారు. అలా అటు ఆర్టీసీ సిబ్బంది డిమాండ్ నెరవేర్చారు.

ఇక తెలంగాణ విషయానికొద్దాం. దేశంలోని ధనిక రాష్ట్రాల్లో ఒకటి. దేశాన్ని తామే సాకుతున్నామని స్వయంగా ముఖ్యమంత్రి కేసీఆరే అసెంబ్లీలో ప్రకటించారు. ఆదాయపరంగా కూడా ముందంజలోనే ఉంది. ఒక్క మద్యం ద్వారానే నాలుగేళ్లలో ఏకంగా రూ.50వేల కోట్లు సంపాదించింది. ఇక రియల్ ఎస్టేట్ ద్వారా వచ్చే ఆదాయం గురించి చెప్పక్కర్లేదు. అందువల్ల ఆర్టీసీ సిబ్బందిని ప్రభుత్వంలో విలీనం చేయడం ఏమీ కష్టం కాదు. పైగా ఆర్టీసీని అన్ని విధాలుగా ఆదుకుంటామని హామీ కూడా ఇచ్చారు. కానీ ఇప్పుడు ఆ ఊసెత్తితే విరుచుకుపడుతున్నారు. ప్రభుత్వంలో విలీనం ముచ్చటే లేదంటున్నారు. సమ్మెకు దిగిన సిబ్బందిని తొలగిస్తామని హెచ్చరికలు జారీచేశారు. జగన్ సింపుల్ గా చేసిన పనిని కేసీఆర్ చేయకుండా పరిస్థితిని తారాస్థాయికి తీసుకెళ్లిపోయారు.

ఆర్టీసీ సిబ్బంది సమస్యల్ని పరిష్కరించాలనే ఉద్దేశం లేకపోవడం వల్లే ఇలా చేశారనే విమర్శలు వస్తున్నాయి. దాదాపు 50వేల కుటుంబాలను రోడ్డున పడేసేలా ఆయన తీసుకున్న నిర్ణయం ఏమాత్రం సరైనది కాదని పలువురు బాహటంగానే చెబుతున్నారు. రాష్ట్రానికి పెద్దగా అందరి బాగోగులు చూడాల్సిన ఆయనే.. ఇలా కక్షసాధింపుగా వ్యవహరించడం సబబు కాదని పేర్కొంటున్నారు. తాను కోరుకున్న కొత్త సచివాలయం, అసెంబ్లీ నిర్మాణాల విషయంలో ఎన్ని అడ్డంకులు ఎదురవుతున్నా ముందుకెళ్తున్న కేసీఆర్.. ఆర్టీసీ విషయంలో మాత్రం అందుకు విరుద్ధంగా వ్యవహరించడం గమనార్హం.