బార్డర్ రగడ.. తప్పెవరిది?

లాక్ డౌన్ నేపథ్యంలో ఏపీకి వెళ్లాలని ప్రయత్నించి రాష్ట్ర సరిహద్దులో చిక్కుకుపోయిన పలువురు ఏపీ వాసులు తీవ్ర ఇబ్బందులు ఎదుర్కొన్నారు. ఒక విధంగా చెప్పాలంటే నరకాన్ని చవిచూశారు. అటు ముందుకెళ్లలేక, ఇటు వెనక్కి వచ్చి ఏం చేయాలో తెలియక పలువురు అక్కడే వేచిచూశారు. చివరకు తెలంగాణ పోలీసుల సహకారంతో పలువురు హైదరాబాద్ తిరిగొచ్చారు. ఈ మొత్తం ఎపిసోడ్ లో తప్పు ఎవరిది అనే అంశం ప్రస్తుతం చర్చనీయాంశంగా మారింది.

హైదరాబాద్ హాస్టళ్ల మూసివేత కారణంగా వేల సంఖ్యలో ఏపీ వాసులు సొంత రాష్ట్రానికి బయలుదేరడం.. వారికి తెలంగాణ పోలీసులు నో అబ్జక్షన్ సర్టిఫికెట్లు ఇవ్వడం.. అవి పట్టుకుని ఏపీ సరిహద్దుకు చేరుకున్నవారిని ఆ రాష్ట్ర పోలీసులు అడ్డుకోవడం.. విషయం రెండు రాష్ట్రాల సీఎంల వద్దకు వెళ్లడం.. వచ్చినవారిని క్వారంటైన్ కు తరలించేందుకు ఏపీ సర్కారు సిద్ధం కావడం.. దానికి కొంతమంది ససేమిరా అనడం.. ఎక్కడివారు అక్కడే ఉండాలని సీఎం జగన్ పేర్కొనడం.. చివరకు సహనం నశించిన పలువురు ఏపీ పోలీసులపై రాళ్లు రువ్వడం.. దీంతో వారు లాఠీచార్జి చేయడం వంటి పరిణామాలు ఇప్పటివరకు చోటుచేసుకున్నాయి.

ఏపీ సరిహద్దులో దాదాపు 24 గంటలపాటు పలువురు తిండీ తిప్పలు లేకుండా వేచి చూశారు. అయినప్పటికీ వారిని రాష్ట్రంలోకి అనుమతించే విషయంలో ఏపీ కఠినంగా వ్యవహరించింది. క్వారంటైన్ కు సిద్ధపడినవారందరినీ రాష్ట్రంలోకి అనుమతిస్తామని తేల్చిచెప్పింది. అయితే, పరీక్షలు నిర్వహించి కరోనా లక్షణాలను లేనివారిని ఇంటికి వెళ్లడానికి అనుమతించాలని పలువురు కోరినా అధికారులు వినలేదు. అందరినీ 14 రోజుల క్వారంటైన్ కు తరలిస్తామని పేర్కొన్నారు.

వైరస్ వ్యాపించకుండా చూసేందుకు ఏపీ తీసుకున్న నిర్ణయం సబబే. లాక్ డౌన్ ఉద్దేశం కూడా అదే. అసలు హైదరాబాద్ నుంచి వారు ఏపీ వెళ్లడానికి తెలంగాణ పోలీసులు ఎన్వోసీ ఇచ్చి ఉండకూడదనే అభిప్రాయాలు వ్యక్తమవుతున్నాయి. ఒకవేళ ఇచ్చినా.. ముందుగానే ఏపీ అధికారులతో మాట్లాడిన తర్వాత నిర్ణయం తీసుకుంటే సరిపోయేది.

ఇదంతా అధికారుల మధ్య సమన్వయం లోపించడంతోనే జరిగిందని తెలుస్తోంది. దీంతో వెంటనే డీజీపీ స్పందించి ఎన్వోసీలు రద్దు చేసినట్టు ప్రకటించారు. ఇక తెలంగాణ పోలీసులు ఈ విషయంతో మానవత్వంతో స్పందించారు. బార్డర్లో చిక్కుకుపోయిన ఏపీవాసులకు అన్నపానీయాలు అందించి దాతృత్వం చాటుకున్నారు. వారిని ఆర్టీసీ బస్సుల్లో హైదరాబాద్ తీసుకొచ్చారు.