స్పెషల్ స్టోరీ: ‘భారత్‌ – చైనా’ యుద్ధమా.? ఎవరి బలమెంత.!

సరిహద్దుల్లో యుద్ధమేఘాలు కమ్ముకుంటున్నాయ్‌.! గాల్వాన్‌ లోయలో చైనా సైన్యం దాష్టీనికి పాల్పడటంతో 20 మంది భారత సైనికులు ప్రాణాలు కోల్పోయిన విషయం విదితమే. ఈ నేపథ్యంలో సరిహద్దుల్లో భారత సైన్యానికి మద్దతుగా వాయుసేన అప్రమత్తమయ్యింది. అత్యాధునిక యుద్ధ విమానాలు రంగంలోకి దిగాయి. అయితే, ఇవన్నీ యుద్ధం కోసమేనని అనడానికి వీల్లేదు. ప్రధానంగా యుద్ధ విమానాల్ని అక్కడి మిలిటరీకి అండగా వుండేందుకు పంపిస్తారు. సరిహద్దుల్లో ప్రత్యర్థుల కుట్రల్ని ఈ యుద్ధ విమానాలు పసిగట్టి, సమాచారాన్ని నేల మీదున్న మిలిటరీ ఫోర్స్‌కి చేరవేస్తాయి. అదే సమయంలో, ప్రత్యర్థులు గనుక దాడికి యత్నిస్తే, యుద్ధ విమానాలు రంగంలోకి దిగి, తాము చెయ్యాల్సిన పనిని చేసేస్తాయి.

పాకిస్తాన్‌లో భారత్‌ జరిపిన సర్జికల్‌ స్ట్రైక్స్‌ తీరు గమనిస్తే ఇది అర్థమవుతుంది. అయితే, పాకిస్తాన్‌ వేరు.. చైనా వేరు. చైనా ఆయుధ సంపత్తి చాలా చాలా ఎక్కువ పాకిస్తాన్‌తో పోల్చి చూసినప్పుడు. యుద్ధ ట్యాంకులు, యుద్ధ నౌకలు, యుద్ధ విమానాలు.. ఇలా చూసినా, భారత్‌ కంటే చైనాదే పై చేయి. అదే సమయంలో, చైనాతో యుద్ధం చేయాల్సి వస్తే.. భారత్‌ తన శక్తికి మించి సత్తా చాటగలదన్న విషయం డ్రాగన్‌ కంట్రీకి బాగా తెలుసు. ఒకప్పుడు చైనా చేతిలో భారత్‌ ఓడిపోయిన మాట వాస్తవం. కానీ, ఇప్పుడు యుద్ధం జరిగితే పరిస్థితులు ఇంకోలా వుంటాయి. ఆయుధాల లెక్కల పరంగా చైనా కంటే భారత్‌ కాస్త వెనకబడి వుండొచ్చుగాక.. కానీ, సామర్థ్యం విషయానికొస్తే.. చైనాని, భారత్‌ ధీటుగానే నిలువరించగలదన్నది నిర్వివాదాంశం.

‘గాల్వాన్‌ లోయ మాదే..’ అంటూ చైనా కొత్త వాదనకు తెరలేపింది. నిజానికి, గాల్వాన్‌ లోయ అనేది భారతదేశంలో అంతర్భాగం. ఆ మాటకొస్తే, ప్రస్తుతం అక్సాయ్‌ చిన్‌ ప్రాంతంగా పిలవబడుతున్న భాగం కూడా భారతదేశంలోనిదే. ఒక్క గాల్వాన్‌ లోయ విషయంలోనే కాదు, భారత్‌తో సరిహద్దు కలిగి వున్న ప్రాంతమంతటిలోనూ చైనా అలజడిని సృష్టించేందుకే ప్రయత్నిస్తోంది. ఇక్కడే దేశ నాయకత్వం మరింత అప్రమత్తంగా వుండాలి. ఆయుధ మోహరింపు ఓ వైపు, చైనాతో చర్చల యుద్ధం ఇంకో వైపు జరగాల్సిందే. అన్నిటికీ మించి, ప్రపంచం దృష్టికి చైనా తీరుని తీసుకెళ్ళాల్సిన బాధ్యత ప్రస్తుతం భారత ప్రభుత్వంపై వుంది. సబ్‌మెరైన్లు, మిస్సైళ్ళు, అత్యాధునిక యుద్ధ విమానాలు.. వీటన్నిటి అవసరం బహుశా ఇప్పుడున్న పరిస్థితుల్లో ఇరు దేశాలకూ రాకపోవచ్చేమో. ఎందుకంటే, చైనాకి తెలుసు.. భారత్‌తో యుద్ధం జరిగితే ఏమవుతుందో. ఎటూ భారతదేశం తనంతట తానుగా యుద్ధం వైపు అత్యుత్సాహం చూపదనుకోండి.. అది వేరే విషయం. ప్రత్యర్థి తోక జాడిస్తే మాత్రం, సమాధానం చెప్పక తప్పదు కదా.!