Vizag: రాజధానిగా విశాఖ.! ఈ ‘ప్రచార పైత్యం’ ఇంకెన్నాళ్ళు.?

Vizag: కార్య నిర్వాహక రాజధానిగా విశాఖపట్నం.. పరిపాలనా రాజధానిగా విశాఖపట్నం.. అసలు సిసలు రాజధానిగా విశాఖపట్నం మాత్రమే.!

బహుశా ఊసరవిల్ల కూడా ఇన్ని మాటలు మార్చదేమో.! విశాఖపట్నం అంటే, ఉత్తరాంధ్రకు పెద్ద దిక్కు. ఉమ్మడి తెలుగు రాష్ట్రంలో హైద్రాబాద్ తర్వాత ఆ స్థాయి వున్న నగరం విశాఖపట్నం మాత్రమే. భిన్న సంస్కృతులకు నిలయం విశాఖపట్నం. తూర్పు నావికాదళం.. అనేక జాతీయ స్థాయి సంస్థలు.. చెప్పుకుంటూ పోతే, విశాఖ ప్రత్యేకతలు అన్నీ ఇన్నీ కావు.

అన్నిటికంటే మిన్నగా, విశాఖ ప్రముఖ పర్యాటక కేంద్రం కూడా. విశాఖ బీచ్.. విశాఖ పరిసర ప్రాంతాల్లో ప్రకృతి రమణీయత.. వెరసి, పెద్ద కథే వుంది. నో డౌట్, ప్రస్తుతం రాష్ట్రంలో విశాఖతో పోల్చితే, ఇకే నగరానికీ రాజధాని అయ్యేందుకు ఇన్ని అర్హతలు వుండవేమో.!

కానీ, చంద్రబాబు హయాంలో అమరావతి ఆంధ్రప్రదేశ్ రాష్ట్రానికి రాజధాని అయ్యింది. రాజధానిగా అమరావతి నోటిఫై అయ్యింది. దాన్ని మార్చాలంటే అంత తేలికైన వ్యవహారం కాదు. కారణం, రైతులతో ప్రభుత్వం ఒప్పందాలు కుదుర్చుకుంది.. సీఆర్డీయే రూపంలో. ఆ ఒప్పందాల్ని ఉల్లంఘిస్తే, పరిణామాలు తీవ్రంగా వుంటాయి.

తప్పో ఒప్పె.. అమరావతి, ఆంధ్రప్రదేశ్ రాష్ట్రానికి రాజధాని అయ్యింది. దాని మీద ‘కమ్మ’రావతి అనే ముద్ర వేసి, నాటకాలు ఆడుతోంది వైసీపీ. అమరావతి కుంభకోణమన్నారు.. అర్థ రూపాయి అవినీతి కూడా ఇంతవరకు వెలికి తీయలేకపోయారు. అసలు విశాఖ మీద ఎందుకంత ప్రత్యేక శ్రద్ధ వైసీపీకి.? ఇదే మిలియన్ డాలర్ క్వశ్చన్.

ఇంత రచ్చ జరుగుతున్నా, విశాఖ ప్రజలు లైట్ తీసుకుంటున్నారు. ఉత్తరాంధ్ర ప్రజానీకమూ రాజధాని అంశాన్ని పెద్దగా పట్టించుకోవడంలేదు. విశాఖ రాజధాని పేరుతో రాష్ట్రాన్ని అయోమయంలోకి నెట్టేయడం.. బహుశా దేశ చరిత్రలో ఏ అధికార పార్టీ ఇలాంటి పైత్యాన్ని ప్రదర్శించి వుండదు.

ఇంకెన్నాళ్ళీ ‘రాజధాని’ ప్రచార పైత్యం.? ఒక్క రాజధాని కట్టలేని చేతకానితనం.! మూడు రాజధానులంటూ కుట్ర పూరిత రాజకీయం.!