నిరుద్యోగుల.. బలవన్మరణాలు.. తెలుగు రాష్ట్రాల్లో ప్రమాద ఘంటికలు.!

ధనిక తెలంగాణలోనూ నిరుద్యోగుల ఆత్మహత్యలు భయపెడుతున్నాయి.. విభజన కారణంగా తీవ్రంగా నష్టపోయిన ఆంధ్రప్రదేశ్ రాష్ట్రంలోనూ అంతకు మించిన స్థాయిలో నిరుద్యోగులు బలవన్మరణాలకు పాల్పడుతున్నారు. దేశవ్యాప్తంగా ఏ రాష్ట్రం చూసినా.. నిరుద్యోగుల బలవన్మరణాలు ఆందోళనకర స్థాయిలోనే కనిపిస్తున్నాయి.

2016 నుంచి 2019 మధ్య నిరుద్యోగుల బలవన్మరణాల కేసులు 24 శాతం పెరిగినట్లు నేషనల్ క్రైమ్ రికార్డ్స్ బ్యూరో (ఎన్‌ఆర్‌సిబి) గణాంకాలు చెబుతున్నాయి. తెలుగు రాష్ట్రాల విషయానికొస్తే, తెలంగాణలో 165 మంది బలవన్మరణానికి పాల్పడగా, ఆంధ్రప్రదేశ్‌లో 206 మంది నిరుద్యోగులు బలవన్మరణాలకు పాల్పడ్డారు. ఇవన్నీ అధికారిక గణాంకాలు మాత్రమే. అనధికారిక లెక్కలు తీస్తే, అధికారిక లెక్కలకంటే ఎన్నో రెట్లు ఎక్కువగా బలవన్మరణాలు కనిపించే అవకాశం వుంది.

కేంద్రంలో నరేంద్ర మోడీ ప్రభుత్వం వచ్చాక, దేశంలో నిరుద్యోగ సమస్య మరింతగా పెరిగిపోయింది. పెద్ద నోట్ల రద్దు వ్యవహారంతో దేశ ముఖ చిత్రమే మారిపోయింది.. ఉద్యోగ, ఉపాధి అవకాశాల పరంగా. 2019 తర్వాతి లెక్కలు బయటకొస్తే, పరిస్థితులు మరింత దారుణంగా వుంటాయన్నది నిర్వివాదాంశం. తెలుగు రాష్ట్రాల్లో.. మరీ ముఖ్యంగా, ఆంధ్రప్రదేశ్ రాష్ట్రంలో ఉద్యోగ, ఉపాధి అవకాశాలకు ఆస్కారమే లేకుండా పోయింది.

గడచిన రెండేళ్ళుగా ఆంధ్రప్రదేశ్ రాష్ట్రంలో తీవ్ర స్తబ్ధత నెలకొంది అభివృద్ధి విషయంలో. ప్రభుత్వం సంక్షేమ పథకాలతో ఓటు బ్యాంకు రాజకీయాలు చేస్తున్నా, అవేవీ సామాన్యుడికి ఊరటనివ్వలేవు. నిరుద్యోగ యువతకు అస్సలు భరోసా ఇవ్వలేకపోతోంది. వాలంటీర్ వ్యవస్థని తీసుకురావడం ద్వారా ఉద్ధరించేశామని చెప్పుకుంటోంది జగన్ సర్కార్. కానీ, అది ఉద్యోగమే కాదని సాక్షాత్తూ ముఖ్యమంత్రి సెలవిచ్చారు. గౌరవ వేతనం మాత్రమే వారికి ఇస్తున్నట్లు ముఖ్యమంత్రి వైఎస్ జగన్ చెప్పుకొచ్చిన సంగతి తెలిసిందే.

నిజానికి, ఉద్యోగం అంటే ప్రభుత్వ ఉద్యోగం మాత్రమే కాదు. అయితే, ప్రభుత్వ శాఖల్లో ఎన్ని ఖాళీలు ఏర్పడుతున్నా, వాటిని భర్తీ చేసేందుకు పాలకుల్లో చిత్తశుద్ధి కనిపించడంలేదు. లక్షల ఉద్యోగాలంటూ ఎన్నికల ప్రచారాల్లో ఊదరగొట్టి, వందల్లో ఉద్యోగాలు కూడా సరిగ్గా భర్తీ చేయలేని అసమర్థ రాజకీయ వ్యవస్థ.. ఈ నిరుద్యోగుల బలవన్మరణాలకు కారణం. అభివృద్ధి మరచిన సంక్షేమం.. ప్రైవేటు రంగంలోనూ నిరుద్యోగులకు అవకాశం లేకుండా చేస్తుండడంతో బలవన్మరణం తప్ప, నిరుద్యోగ యువతకు మరో మార్గమేదైనా కనిపిస్తోందా.? అన్నది సగటు నిరుద్యోగి ఆవేదన.