ఫోర్జరీ ఆరోపణలు: టీవీ 9 రవిప్రకాష్‌ ఎక్కడ.?

ఓ సాధారణ జర్నలిస్ట్‌గా కెరీర్‌ ప్రారంభించి, ఓ పెద్ద మీడియా సంస్థకి అధిపతిగా మారిన రవిప్రకాష్‌, టీవీ9 ద్వారా తెలుగు రాష్ట్రాల్లో అందరికీ సుపరిచితుడే. ఇటీవలే టీవీ9 సంస్థ నుంచి నేషనల్‌ న్యూస్‌ ఛానల్‌ కూడా బయటకొచ్చింది. అయితే, గత కొంతకాలంగా టీవీ9లో అంతర్గత విభేదాలంటూ ప్రచారం జరుగుతూ వస్తోంది. టీవీ9 రవిప్రకాష్‌ చుట్టూ చాలా ఆరోపణలు విన్పిస్తున్నాయి. తాజాగా రవిప్రకాష్‌పై నిధుల మళ్ళింపు ఆరోపణలు వచ్చాయి. ఇటీవల టీవీ9 సంస్థలో పెద్దయెత్తున వాటాల్ని కొనుగోలు చేసి, సంస్థను టేకోవర్‌ చేసిన అలమంద మీడియా రవిప్రకాష్‌పై ఆరోపణలు చేస్తూ పోలీసులను ఆశ్రయించింది.

ఏబీసీఎల్‌ కార్పొరేషన్‌ నుంచి 90 శాతం షేర్లను కొనుగోలు చేసిన అలమంద మీడియా, టీవీ9ని టేకోవర్‌ చేసింది. యాజమాన్యం మారిన తర్వాత చోటు చేసుకున్న పరిణామాలు టీవీ9 రవిప్రకాష్‌ని వివాదాల బోనెక్కించాయి. ప్రస్తుతం ఆయన కోసం పోలీసులు అన్వేషిస్తున్నారట. విదేశాల్లో టీవీ9 రవిప్రకాష్‌ వున్నారనీ, అన్ని సమస్యలూ త్వరలోనే పరిష్కారమవుతాయనీ మీడియా వర్గాల్లో కొందరు అభిప్రాయపడుతున్నారు. అయితే వివాదాలు రవిప్రకాష్‌కి కొత్తేమీ కాకపోయినా, ఈసారి ఆయనకు కోలుకోలేని దెబ్బ తగలడం ఖాయమని ఇంకొందరు అంటున్నారు.

టీవీ9 కార్యాలయం నుంచి విలువైన సమాచారం ‘దొంగతనానికి’ గురయ్యిందని, కొన్ని ముఖ్యమైన పత్రాలు ఫోర్జరీకి గురయ్యాయని కూడా ఆరోపణలు వెల్లవెత్తుతున్నాయి. మామూలుగా అయితే మీడియా సంస్థల విషయంలో ఇలాంటి వ్యవహారాలు మరీ అంత పాపులర్‌ కావు. కానీ, తెలుగు నాట అత్యంత పాపులర్‌ అయిన మీడియా సంస్థ టీవీ9కి సంబంధించి ఎప్పటికప్పుడు ఇలాంటి వివాదాల గురించి వింటూనే వున్నాం. పైకి చెప్పే నీతులకి, పాటించే విలువలకీ సంబంధమే వుండదని కొందరు అంటుంటారు. అయితే టీవీ9 ఎదుగుదల చూసి ఓర్వలేనివారు చేసే ఇలాంటి దుష్ప్రచారాలకు విలువ వుండదనే వాదన కూడా ఇంకో వైపునుంచి విన్పిస్తుంటుంది.

తెలంగాణ రాష్ట్ర సమితితో వివాదాల కారణంగా కొన్నాళ్ళపాటు టీవీ9 తెలంగాణలో అనధికారికంగా బ్యాన్‌కి గురైన సంగతి తెల్సిందే. పవన్‌కళ్యాణ్‌ విషయంలో శ్రీరెడ్డి ద్వారా అత్యుత్సాహం చూపినందుకు అప్పట్లో పవన్‌కళ్యాణ్‌ అభిమానులూ టీవీ9నీ ఆ ఛానల్‌ సీఈఓ రవిప్రకాష్‌నీ టార్గెట్‌ చేశారు. ఒకానొక సమయంలో రవిప్రకాష్‌పై పవన్‌కళ్యాణ్‌ కూడా వరుస ట్వీట్లు వేయడం అప్పట్లో పెద్ద సంచలనమే అయినా, ఆ తర్వాత ఆ వివాదం చల్లారింది. చెప్పుకుంటూ పోతే ఇలాంటి వివాదాలెన్నో కన్పిస్తాయి ఆ సంస్థకు సంబంధించి.

ఏదిఏమైనా, రవిప్రకాష్‌ అజ్ఞాతంలోకి వెళ్ళారన్న ప్రచారం దరిమిలా, ఆయన మీడియా ముందుకొస్తే తప్ప ఈ ఊహాగానాలకు చెక్‌పడే అవకాశం లేదు. తాజా పరిణామాల గురించీ, కేసుల గురించీ టీవీ9 ఎలాంటి వివరణ ఇస్తుందో వేచి చూడాలి.