కొన్నాళ్ల క్రితం వచ్చిన ఓ తెలుగు సినిమాలో విలన్ ని హీరో కరెంట్ షాక్ పెట్టి చంపుతాడు. అంటే సదరు సినిమా దర్శకుడు కరెంట్ షాక్ పెట్టి ఎలా చంపాలో జనాలకు నేర్పించినట్లా?.. ఇంకో సినిమాలో విలన్ తాలూకా ఆకు రౌడీలను హీరో ఎడాపెడా నరుక్కుంటూ పోతాడు. దాని అర్థం ఎలా నరకాలో ఆ ప్రేక్షకులకు డైరెక్టర్ డెమో ఇచ్చినట్లా?. సినిమాల్లో డ్రగ్స్ తీసుకునే సీన్లు పెట్టడం నేరమే అయితే పైన చెప్పుకున్న రెండు ఉదాహరణలు కూడా నేరం చేయడానికి ప్రేరేపించేవనే కదా అర్థం. సినిమాలో చూపించిన సీన్లు సొసైటీ మీద ప్రభావం చూపుతాయా? అన్న విషయం పక్కన పెడితే.. అసలు సమస్య రేవ్ పార్టీలు, పబ్బుల ద్వారా వస్తుంటే సినిమాలో ఉండే సీన్లపై అభ్యంతరం చెప్పడం ఎంతవరకు సబబు? అనే విషయంపై సోషల్ మీడియాలో జోరుగా చర్చ జరుగుతోంది. కారణం.. హైదరాబాద్ లో మళ్లీ డ్రగ్స్ కలకలం రేగుతోంది. పోలీసు శాఖ ఇప్పటికే డ్రగ్స్ కేసులో పలువురిని అరెస్టు చేయగా.. కొంతమంది ప్రముఖులకు నోటీసులు జారీ చేశారు. అందులో రీసెంట్ హిట్ మూవీ ‘బేబీ’ సినిమా దర్శకుడు రాజేష్ కూడా ఒకరు. ఆ సినిమాలో డ్రగ్స్ తీసుకునే సీన్లు చూపించడంపై వివరణ ఇవ్వాలంటూ రాజేష్ కి పోలీసులు నోటీసులు జారీ చేశారు.
పోలీసుల తీరుపై కొందరు తీవ్రంగా అభ్యంతరం వ్యక్తం చేస్తున్నారు. ఆ సినిమాలో డ్రగ్స్ సీన్లు అంత అభ్యంతరకరంగా ఉంటే సెన్సార్ బోర్డ్ ఎందుకు కత్తిరించనట్లు?. సెన్సార్ వాళ్ళకి అవి తప్పనిపించలేదా?. అయినా ఆ సినిమా విడుదలై థియేటర్లలో ఆడి.. ఓటీటీలో కూడా పాతబడిపోయింది. ఆ సినిమాపై చర్యలు తీసుకోవాలనుకుంటే రిలీజ్ అయిన వెంటనే ఎందుకు స్పందించలేదు?. కనీసం ఓటీటీలో విడుదలయ్యేటప్పుడైనా అభ్యంతరం చెప్పుంటే ఆ సీన్లకు కత్తెరపడేది కదా!. థియేటర్లలో ఆడి.. ఓటీటీలోనూ అందరూ చూసేశాక ఇప్పుడు చర్యలు తీసుకుని ఏం లాభం? కొద్ది రోజుల్లో ఆ సినిమా ప్రీమియర్ ను టీవీల్లో కూడా వేయునున్నారు. సాధారణంగా టీవీ ప్రేక్షకుల్లో ఎక్కువ భాగం మహిళలు, మధ్య వయసు ఉన్నవాళ్లే. యువత తప్ప ఈ సినిమాని టీవీలో చూడడానికి వాళ్ళు అంతగా ఆసక్తి చూపించరు. మరి ఇప్పుడు ఆ దర్శకుడు వివరణ ఇచ్చి చేసేదేముంది?. అనే చర్చ సోషల్ మీడియాలో జోరుగా సాగుతోంది.
అయినా.. డ్రగ్స్ తీసుకునే వాళ్లు బానిసలవుతారు తప్ప చట్ట ప్రకారం నేరస్థులు ఎలా అవుతారని కొందరు ప్రశ్నిస్తున్నారు. మొన్నామధ్య ఓ సినిమాలో పవన్ కళ్యాణ్ చెప్పినట్లు చీడని ఓ చోట పెట్టుకొని మందు మరోచోట వేయాలనుకోవడం ఏంటి?. అసలు పట్టుకోవాల్సింది,శిక్షించాల్సింది డ్రగ్స్ నెట్వర్క్ ని కదా. డ్రగ్ సప్లయర్స్, పెడలర్స్ ని వదిలేసి ఇలా సినిమాలో చూపించిన సీన్లపై అభ్యంతరం చెప్పడం ఏంటని కొందరు ప్రశ్నిస్తున్నారు. మరి ఈ పరిణామాలపై టాలీవుడ్ ఎలా స్పందిస్తుందో చూడాలి.