రాయలసీమ ఎత్తిపోతలపై సుప్రీంకోర్టుకు వెళ్లండి: తెలంగాణ హైకోర్టు

రాయలసీమ ఎత్తిపోతల పథకం విషయంలో ఆంధ్రప్రదేశ్, తెలంగాణ రాష్ట్రాల మధ్య జల వివాదం తలెత్తిన సంగతి తెలిసిందే. ఈ పథకం ద్వారా తెలంగాణకు నష్టమని ఇప్పటికే తెలంగాణ ప్రభుత్వం వాదిస్తోంది.

ఈ నేపథ్యంలో కాంగ్రెస్ నేత వంశీచంద్ రెడ్డి, శ్రీనివాస్ హైకోర్టులో ప్రజాప్రయోజన వ్యాజ్యం వేశారు. ఈ అంశాన్ని విచారణకు స్వీకరించిన హైకోర్టు పలు వ్యాఖ్యలు చేసింది. అంతర్రాష్ట్ర జలవివాదాలు హైకోర్టు ఎలా విచారణ చేస్తుందని ప్రశ్నించింది.

అయితే.. ఏపీ పునర్విభజన చట్టం పరిధిలో వివాదాలు పరిశీలించాలని పిటిషనర్ల తరపున న్యాయవాది కోర్టుకు విన్నవించారు. ఎలా విచారించినా ఈ అంశం రెండు రాష్ట్రాలకు చెందిన వివాదం కాబట్టి సుప్రీంకు వెళ్లాలని సూచించింది. ఇందుకు గతంలో పంజాబ్ – రాజస్థాన్ అంశాన్ని ప్రస్తావించింది.

పంజాబ్ నదీ జలాలను రాజస్థాన్ కు విడుదల చేయడంలో సుప్రీంకోర్టు జోక్యం చేసుకుందని తెలిపింది. దీంతో పిటిషనర్లతో ఈ విషయం చెప్తామని న్యాయవాది కోర్టుకు తెలపడంతో రేపటికి ఈ కేసును వాయిదా వేసింది.

రాయలసీమ ఎత్తిపోతల ద్వారా ఆంధ్ర 40వేల క్యూసెక్కుల అదనపు నీటిని ఎత్తిపోస్తుందని తెలంగణ వాదిస్తోంది. ఇది కొత్త పథకం కాదనీ.. పోతిరెడ్డిపాడు హెడ్ రెగ్యులేటర్ నుంచి వస్తున్న నీటిని వినియోగించుకుంటామని ఇందులో నిబంధనల ఉల్లంఘన లేదని ఏపీ వాదిస్తోంది.

దీనిపై కృష్ణా నదీ యాజమాన్య బోర్డు కూడా కలుగజేసుకుంది. ఏపీకి మద్దతుగా పర్యావరణ అనుమతులు అవసరం లేదని కేంద్రం జాతీయ హరిత ట్రిబ్యునల్ కు నివేదించింది.