వాళ్ల కూతుళ్లపై దారుణం జరిగితే ఇలానే చేస్తారా?: టీడీపీ  

ముఖ్యమంత్రి జగన్ మోహన్ రెడ్డి అసమర్థతతో రాష్ట్రం అత్యాచారాంధ్రప్రదేశ్ గా తయారైందని తెలుగు మహిళ రాష్ట్ర అధ్యక్షురాలు వంగలపూడి అనిత ఆరోపించారు. నేషనల్ క్రైమ్ బ్యూరో ఆఫ్ రికార్డ్స్ లో ఆడవారిపై అత్యాచారాలు, అఘాయిత్యాలు, మానవ అక్రమ రవాణాలో రాష్ట్రం అగ్రస్థానంలో ఉండటం బాధాకరమని అన్నారు. మీడియా సమావేశంలో ఆమె మాట్లాడుతూ.. ‘ఏపీలో ముక్కుపచ్చలారని చిన్నారి నుంచి ముదుసలివరకు ఎవరికీ రక్షణలేదు. దిశచట్టం పచ్చిబూటకమని అందరికీ అర్థమైంది. ప్రభుత్వం మహిళలకు ఎలా రక్షిస్తుందో చెప్పాలి. ఏపీలో ఆడబిడ్డలపై దారుణాలు జరుగుతుంటే ఆడబిడ్డ తండ్రి జగన్‍లో చలనమెందుకు లేదు. డీజీపీ కూతురికో, హోంమంత్రి కూతురికో ఏదైనా జరిగితే రూ.10 లక్షలు, 5 సెంట్లు ఇల్లు తీసుకొని సరిపెట్టుకుంటారా..?’.

‘నెల్లూరులో జరిగిన ఘటనను వీడియో తీసి మరీ చేశారంటే అది ప్రభుత్వ వైఫల్యం కాదా? రాష్ట్రంలో నిత్యం ఏదో ఒకమూల మహిళలు, యువతులు ఘోరాలకు బలవుతున్నారు. మృగాళ్ల దురాగతాలను ప్రభుత్వపెద్దలు, సలహాదారులు, హోంమంత్రి కూడా సమర్థించుకోవడం సిగ్గుచేటు. డీజీపీ ఇంట్లోనో, ముఖ్యమంత్రి, హోంమంత్రి కూతుళ్లపైన దారుణం జరిగితే  న్యాయం పేరుతో డబ్బులిచ్చి సరిపెడతారా? సీసీకెమెరాలు, దిశాచట్టం ఉన్నాయని చెప్పడం తప్ప, ఎందరు నిందితులను శిక్షించారు? మేడికొండూరు బాధితురాలిని పరామర్శించడానికి కూడా హోంమంత్రికి తీరికలేదు. ఇద్దరు మైనర్ బాలికలపై తండ్రీకొడుకులు అత్యాచారయత్నంచేస్తే, వారినేంచేశారు? ఆడపిల్లలపై వాలంటీర్లు, వైసీపీ నేతలు, కార్యకర్తలు దారుణాలకు తెగబడినప్పుడే సీఎం స్పందించలేదు’.

‘స్వయంగా ఎమ్మెల్యేలు, మంత్రులు రాసలీలలు బయటకొచ్చినా హోంమంత్రి చర్యలు తీసుకోరు. వ్యవస్థ,  ఈ ముఖ్యమంత్రి, ప్రభుత్వం ఇలా ఉంటే, ఇక సామాన్యులకు, మహిళలకు రాష్ట్రంలో రక్షణ ఉందంటే ఎవరైనా నమ్ముతారా? లేని దిశచట్టంపై సమీక్షలు నిర్వహిస్తున్న సీఎం, దారుణాలు జరిగితే బాధితురాళ్లతో ఎందుకు మాట్లాడడు? లోకేశ్ ని విజయవాడలో నిలువరించడంపై పెట్టిన శ్రద్ధలో సగం కూడా పోలీసులు ఆడబిడ్డలకు రక్షణ కల్పించడంపై పెట్టడంలేదు. పోలీస్ వ్యవస్థ ఉందే ప్రజలను రక్షించడానికి.. డీజీపీ ఏనాడైనా మహిళలు, యువతుల భద్రతపై సమీక్ష చేశారా?’ అని ఆమె ప్రశ్నించారు.