టీడీపీకి కొత్త ఫ్రెండ్ దొరికాడోచ్.!

తెలుగుదేశం పార్టీ ప్రస్తతం రాష్ట్రంలో ఎలా ఉన్నదో చెప్పక్కర్లేదు.  ఆ పార్టీ ఎన్నో ఇబ్బందులు ఎదుర్కొంటోంది.  గత ఎన్నికల్లో కేవలం 23 స్థానాల్లో మాత్రమే విజయం సాధించింది.  ఈ 23 మందిలో ఒక ఎమ్మెల్యే ఇప్పటికే బయటకు వెళ్ళిపోయాడు.  ముగ్గురు ఎంపీలు ఉన్నారు.  ఇంతవరకు బాగానే ఉన్నది.  ఎన్నికలకు ముందు బీజేపీని కాదని చెప్పి ఒంటరిగా పోటీకి దిగారు.  2014 ఎన్నికల్లో తెలుగుదేశం పార్టీ అటు బీజేపీ, ఇటు జనసేన పార్టీతో పొత్తు పెట్టుకోవడం వలనే విజయం సాధించింది.

ఈ విషయం అందరికి తెలిసిందే.  జనసేన పార్టీ సపోర్ట్ వలనే గెలిచినట్టు బాబు అనేక సందర్భాల్లో చెప్పుకుంటూ వచ్చారు.  కానీ, ఎన్నికల సమయంలో ఇచ్చిన హామీల విషయంలో బాబు వెనకడుగు వేయడంతో జనసేన పార్టీ పొత్తు నుంచి బయటకు వచ్చింది.  2019 ఎన్నికల్లో మూడు పార్టీలు ఒంటరిగానే పోటీ చేశాయి.  మూడు ఒంటరిగా పోటీ చేయడంతో వైకాపాకు కలిసి వచ్చింది.  అధికారం చేజిక్కించుకుంది.

ఎన్నికలు ముగిసిన తరువాత బీజేపీ, జనసేన పార్టీలు తిరిగి ఒక్కటయ్యాయి.  పొత్తు పెట్టుకున్నాయి.  కానీ, బాబును మాత్రం దగ్గరకు రానివ్వలేదు.  దీంతో టీడీపీ చూపులు కొత్త ఫ్రెండ్ కోసం గాలించగా ఆ పార్టీకి ఎంఐఎం దోస్తీగా కుదిరింది.  కేంద్రం తీసుకొచ్చిన సిఏఏ ను వ్యతిరేకిస్తూ వస్తున్న ఎంఐఎంకు ఆంధ్రప్రదేశ్ లో టీడీపీ సపోర్ట్ గా నిలిచింది.  ఎంపీ కేశినేని నాని ఈ విషయంలో చొరవచూపినట్టుగా తెలుస్తోంది.  కేంద్ర నిర్ణయాన్ని వ్యతిరేకిస్తూ ఇటీవలే కడపలో బైక్ ర్యాలీ నిర్వహించారు.  అలానే విజయవాడలో భారీ సభ ఏర్పాటు చేసిన సంగతి తెల్సిందే.  ఈ సభకు అక్బరుద్దీన్ హాజరయ్యారు.  భారీ సభ జరగడం, కేంద్రానికి వ్యతిరేకంగా మాట్లాడటంతో పాటుగా వైకాపాను ఇరకాటంలో పెట్టాలని చూడటంతో ఎంఐఎంతో పొత్తు పెట్టుకొని ఆంధ్రప్రదేశ్ లో మైనారిటీలకు తాము దగ్గరగా, అండగా ఉంటాము అనే సంకేతాలు పంపుతున్నది.  మరి దీనిని వైకాపా ఎలా ఎదుర్కొంటుందో చూడాలి.