జూనియర్ ఎన్టీయార్ చెబితే నేరం.! బాలయ్య పొగిడితే అద్భుతం.!

మాజీ మంత్రి కొడాలి నానితో టీడీపీ నేతలు తిరిగితే అద్భుతం.! అదే కొడాలి నాని విషయంలో యంగ్ టైగర్ ఎన్టీయార్ కాస్తంత సానుకూలంగా వున్నా అది నేరం. దివంగత వైఎస్ రాజశేఖర్ రెడ్డి కూడా ఎన్టీయార్‌లానే గొప్ప నాయకుడని ఎన్టీయార్ చెబితే అది పాపం.! అదే, నందమూరి బాలకృష్ణ గనుక ‘వైఎస్ రాజశేఖర్ రెడ్డి గొప్పవాడు’ అని చెబితే, అహో బాలయ్య.. అంటారు.!

తెలుగుదేశం పార్టీలో, నందమూరి అభిమానుల్లో యంగ్ టైగర్ ఎన్టీయార్ అంటే ఎందుకింత వ్యతిరేకత.? నందమూరి బాలకృష్ణ అంటే ఎందుకంత ఇష్టం.? ఒకే మాట, ఒకరి నోట వస్తే ఒకలా.. ఇంకొకరి నోట వస్తే ఇంకొకలా తెలుగుదేశం పార్టీ ఎందుకు తీసుకుంటోంది.

మాజీ ముఖ్యమంత్రి కిరణ్ కుమార్ రెడ్డితో నందమూరి బాలకృష్ణ అన్‌స్టాపబుల్ టాక్ షో నిర్వహించారు. ఈ సందర్భంగా స్వర్గీయ వైఎస్ రాజశేఖర్ రెడ్డి పేరు ప్రస్తావనకు వస్తే, బాలయ్య భలేగా పొగిడేశారు. పొగడాలి మరి.! ఎందుకంటే, హత్య కేసు నుంచి ఆయనకు ఆ స్థాయిలో ఊరట కల్పించారు వైఎస్ రాజశేఖర్ రెడ్డి.

వైఎస్ రాజశేఖర్ రెడ్డి వల్ల నందమూరి బాలకృష్ణ లాభపడ్డారు. కానీ, జూనియర్ ఎన్టీయార్ ఆయన వల్ల ఏ లాభమూ పొందలేదు. ఏపీ హెల్త్ యూనివర్సిటీ పేరులోంచి ఎన్టీయార్‌ని తొలగించి వైఎస్సార్‌ని పెట్టడంపై జస్ట్ జూనియర్ ఎన్టీయార్ సోషల్ మీడియా వేదికగా ఓ ప్రకటన విడుదల చేశాడంతే. ‘పేరు మార్చడం వల్ల ఎన్టీయార్ స్థాయి తగ్గదు, వైఎస్సార్ స్థాయి పెరగదు’ అని అర్థం వచ్చేలా ఎన్టీయార్ ట్వీటేశాడు.

దాన్ని తీవ్రంగా తప్పు పట్టింది టీడీపీలో ఓ వర్గం. మరి, ఇప్పుడు బాలయ్యను టీడీపీ నుంచి తొలగిస్తారా.? తొలగించాలి మరి.. ఆ స్థాయిలో గతంలో ఎన్టీయార్ మీద వైఎస్సార్ విషయమై టీడీపీ శ్రేణులు మండిపడ్డాయ్ కదా.? యంగ్ టైగర్ ఎన్టీయార్ అభిమానులు ఇదే విషయమై టీడీపీపీని ప్రశ్నిస్తున్నారు. ప్రశ్నించడమేంటి, టీడీపీ విశ్వాసఘాతుకానికి పాల్పడుతోందంటూ మండిపడుతున్నారు.

టీడీపీకి సమీప భవిష్యత్తులో యంగ్ టైగర్ ఎన్టీయార్ ఏమన్నా ‘బలం’ అవుతాడేమోగానీ, నందమూరి బాలకృష్ణ వల్ల అస్సలేమాత్రం ప్రయోజనం లేదు.