వైఎస్ జగన్ ప్రభుత్వానికి దిమ్మతిరిగే షాక్ ఇచ్చిన సుప్రీం కోర్టు

ప్రభుత్వ భవనాలకు పార్టీ రంగులు వేసిన విషయంలో మరోసారి ఏపీ ప్రభుత్వానికి సుప్రీంకోర్టులో చుక్కెదురైన సంగతి తెలిసిందే. నాలుగు వారాల్లోగా ఆ రంగులు మార్చాల్సిందేనంటూ సర్వోన్నత న్యాయస్థానం స్పష్టమైన ఆదేశాలిచ్చింది. ఇప్పటికే హైకోర్టులో రెండు సార్లు, సుప్రీంకోర్టులో రెండు సార్లు ఈ విషయంలో మొట్టికాయలు వేయించుకున్న ఏపీ సర్కారుకు ఇక ఆ రంగులు తొలగించడం మినహా మరో మార్గం లేదని తెలుస్తోంది. నాలుగు వారాల్లోగా రంగులు తొలగించకుంటే కోర్టు ధిక్యార చర్యలు తీసుకుంటామని సుప్రీంకోర్టు స్పష్టం చేసిన నేపథ్యంలో ఇక ఆ దిశగా ఉపక్రమించక తప్పని పరిస్థితి నెలకొంది.

ప్రభుత్వ పెద్దలు చాలా చిన్న చిన్న విషయాల్లో పట్టుదలకు పోవడం వల్లే కోర్టుల్లో అక్షింతలు వేయించుకోవాల్సిన పరిస్థితి తెచ్చుకుంటున్నారనే వ్యాఖ్యలు వినిపిస్తున్నాయి. ప్రభుత్వ భవనాలకు పార్టీ రంగులు వేయడం వల్ల ఒనగూరే లాభం ఏమిటి? దానివల్ల ఓట్లు పడవు కదా? అయినా ఈ విషయాన్ని వారు ఎందుకు అంత ప్రతిష్టాత్మకంగా తీసుకుంటున్నారో అర్థం కావడంలేదని పలువురు అంటున్నారు. రంగుల విషయంలో వైసీపీకి ఇప్పటికే చాలా చెడ్డ పేరు వచ్చింది. హైకోర్టుతోపాటు సుప్రీంకోర్టులోనూ ఎదురుదెబ్బలు చవిచూసింది. అయినప్పటికీ ఆ పార్టీ నేతల వైఖరి మాత్రం మారడంలేదు.

ఇటీవల ప్రారంభించిన రైతు భరోసా కేంద్రాలకు కూడా పలుచోట్ల అవే రంగులు వేసినట్టు వార్తలొచ్చాయి. తాజాగా వెలువడిన సుప్రీంకోర్టు తీర్పుతో వాటన్నింటికీ తొలగించక తప్పదు. ఇప్పటివరకు ప్రభుత్వ భవనాలకు పార్టీ రంగులు వేయడానికి ఎంత ఖర్చు పెట్టారో, మరోసారి అంత మొత్తం వెచ్చించి కొత్త రంగులు వేయాల్సిందే. అంటే.. డబుల్ ఖర్చు అన్నమాట. మొత్తానికి రంగుల విషయంలో అటు డబ్బులు ఖర్చు కావడంతోపాటు ఇటు వ్యతిరేకత కూడా మూట గట్టుకోవాల్సి వచ్చింది. మరి ఇప్పటికైనా ఈ విషయంలో సర్కారు సుప్రీంకోర్టు ఆదేశాలు పాటిస్తుందా లేక మరేదైనా వ్యూహంతో ముందుకెళ్తుందా అన్నది చూడాలి.