కరోనా ‘లాక్‌’ డౌన్‌: రాష్ట్రాలు ఏమంటున్నాయంటే.!

ఏ రాష్ట్రమైనా, ఏ దేశమైనా తమ ప్రజల గురించే ఆలోచించాల్సి వుంటుంది.. అలాగే ఆలోచించాలి కూడా.! అదే పాలకుల ధర్మం. మన దేశం విషయానికొస్తే.. ‘బతికుంటే బలుసాకు తినొచ్చు..’ అని పెద్దలు ఎప్పుడో చెప్పిన మాటని నిన్న తెలంగాణ ముఖ్యమంత్రి కేసీఆర్‌ ప్రస్తావించినట్లే, మిగతా రాష్ట్రాలు కూడా ఆలోచిస్తున్నాయి.

‘మా రాష్ట్రంలో కేసుల తీవ్రత తక్కువ కాబట్టి, లాక్‌ డౌన్‌ని ఎత్తివేయడమే మంచిది..’ అని ఏ రాష్ట్రమూ కేంద్రంపై ఒత్తిడి తెచ్చే ప్రసక్తే కన్పించడంలేదు. కరోనా వైరస్‌ (కోవిడ్‌19) ఆషామాషీ వ్యవహారం కాదు. ఒక్క కరోనా పాజిటివ్‌ వ్యక్తి.. మొత్తం రాష్ట్రాన్ని, దేశాన్ని, ప్రపంచాన్ని నాశనం చేసెయ్యగలడు.

నిజమే మరి.. కరోనా వైరస్‌ అలాగే వ్యాప్తి చెందింది.. విస్తరించింది. చైనాలో పుట్టిన కరోనా వైరస్‌, తమ దేశానికి వచ్చే అవకాశమే లేదని అగ్రరాజ్యం అమెరికా అధ్యక్షుడు డోనాల్డ్‌ ట్రంప్‌ వెటకారం చేశారుగానీ.. ఇప్పుడు అదే అమెరికా, అదే కరోనా వైరస్‌ దెబ్బకి విలవిల్లాడుతోంది. అమెరికా పరిస్థితి చూశాక, ప్రపంచంలో ఏ దేశమూ ‘లాక్‌ డౌన్‌’కి వ్యతిరేకంగా మాట్లాడే పరిస్థితి వుండదు.

తమ దేశంలో కేసుల తీవ్రత తక్కువ వున్నా సరే, ఒకవేళ కేసుల సంఖ్య పెరిగే అవకాశం వుంటే మాత్రం.. ‘లాక్‌ డౌన్‌’ మంత్రాన్నే పరిష్కరించాలి. సో, మన దేశంలో ఏ రాష్ట్రం కూడా ఏప్రిల్‌ 14వ తేదీలో కరోనా లాక్‌ డౌన్‌ ముగింపును ఒప్పుకోకపోవచ్చు. ఒకవేళ ఈలోగా కేసుల తీవ్రత క్రమక్రమంగా తగ్గిపోతే మాత్రం.. లాక్‌డౌన్‌ ఎత్తివేయడానికి కేంద్రం పెద్దగా ఆలోచించకపోవచ్చు కూడా.

నిన్నటిదాకా కేసుల తీవ్రత ఎక్కువగానే వున్నా, ఈ రోజు ఆ తీవ్రత కాస్త తగ్గినట్లుగా ప్రచారం జరుగుతోంది. ఈ రోజు రాత్రి 9 గంటల వరకు పరిస్థితి అదుపులోనే వుంటే.. ‘తీవ్రత తగ్గింది’ అనే అవగాహనకు రాగలం. అలా జరగాలని ప్రతి భారతీయుడూ కోరుకోవాల్సిన సందర్భమిది.

తెలంగాణ బాటలోనే దేశంలోని చాలా రాష్ట్రాలు పయనిస్తున్నాయి. కేంద్రానికి ‘లాక్‌ డౌన్‌ పొడిగింపు’ దిశగా సూచనలు కూడా చేస్తున్నాయి. అతి త్వరలో ప్రధాని నరేంద్ర మోడీ వివిధ రాష్ట్రాల ముఖ్యమంత్రులతో ఇంకోసారి వీడియో కాన్ఫరెన్స్‌’ నిర్వహించబోతున్నారట. ఆ తర్వాతే కరోనా ‘లాక్‌’డౌన్‌ విషయమై ఓ స్పష్టత వస్తుంది. వాస్తవానికి ఏప్రిల్‌ 14తో లాక్‌డౌన్‌ ముగియాల్సి వుంది.