సంక్రాంతి సినిమాలపై ఆశలు, భయాలూ.!

2019 సంక్రాంతికి వచ్చిన సినిమాల్లో ‘వినయ విధేయ రామ’ దారుణంగా నిరాశపర్చింది. రామ్‌చరణ్‌ కెరీర్‌లోనే కంటెంట్‌ పరంగా బిగ్గెస్ట్‌ డిజాస్టర్‌ సినిమా అది. అయితే, రామ్‌చరణ్‌ స్టార్‌డమ్‌.. ఈ సినిమాని కాస్త గట్టున పడేసింది. అంటే, నస్టాల్ని తగ్గించిందన్నమాట. లేకపోతే, డిజాస్టర్‌ టాక్‌తో 70 కోట్ల పైన షేర్‌ వసూలు చేయడమేంటి.? మరోపక్క, సంక్రాంతికే వచ్చిన ‘ఎఫ్‌2’ సంచలన విజయాన్ని అందుకుంది. వరుణ్‌ తేజ్‌, వెంకటేష్‌ కాంబినేషన్‌లో అనిల్‌ రావిపూడి దర్శకత్వంలో ఈ సినిమా రూపొందిన విషయం విదిమే.

ఈ సంక్రాంతికీ అనిల్‌ రావిపూడి సత్తా చాటేందుకు సిద్ధమవుతున్నాడు ‘సరిలేరు నీకెవ్వరూ’ సినిమాతో. మరోపక్క 2018 సంక్రాంతికి ‘అజ్ఞాతవాసి’తో షాకిచ్చిన త్రివిక్రమ్‌ శ్రీనివాస్‌, ఈసారి సంక్రాంతికి ‘అల వైకుంఠపురములో’ సినిమాతో వస్తున్నాడు. దాంతో, ఈ సంక్రాంతిపై ఆశలే కాదు, అనుమానాలూ ఎక్కువగానే వ్యక్తమవుతున్నాయి.

‘సరిలేరు నీకెవ్వరూ’, ‘అల వైకుంఠపురములో’ సినిమాలపై ప్రీ రిలీజ్‌ బజ్‌ బీభత్సంగా కన్పిస్తోంది. హైప్‌ గురించి ఎంత చెప్పుకున్నా తక్కువే. ఈ రెండిట్లో ఏ సినిమా మీదా కాస్తంత నెగెటివిటీ కూడా కన్పించకపోవడం గమనార్హం. ఇద్దరూ ఒకరితో ఒకరు పోటీ పడుతున్నారు.

ఒక్క రోజు గ్యాప్‌లోనే ఈ రెండు సినిమాలూ రాబోతున్నాయి. 2019ని తీసుకుంటే, భారీ అంచనాలతో వచ్చిన సినిమాలు బాక్సాఫీస్‌ వద్ద సరిగ్గా నిలబడలేకపోయాయి. దాంతో, 2020 ఆ కొరత తీరుస్తుందని సగటు సినీ అభిమాని ఆశిస్తున్నాడు. ‘అల వైకుంఠపురములో’ కావొచ్చు, ‘సరిలేరు నీకెవ్వరూ’ కావొచ్చు.. ఈ రెండిటి టార్గెట్‌ 100 కోట్ల వసూళ్ళే.

ఆల్రెడీ మహేష్‌, ‘మహర్షి’ సినిమాతో 100 కోట్ల క్లబ్‌లో చేరిపోయాడు. మరి అల్లు అర్జున్‌ పరిస్థితి ఏంటి.? భయాల సంగతి పక్కన పెట్టి.. రెండు సినిమాలపైనా పాజిటివ్‌ ఎక్స్‌పెక్టేషన్స్‌ పెట్టుకోవచ్చు. ఈ సంక్రాంతికి రెండు సినిమాలూ ఘన విజయాల్ని అందుకుంటే, 2020లో తెలుగు సినిమాకి సూపర్బ్‌ బిగినింగ్‌ వచ్చినట్లే భావించాల్సి వస్తుంది.