జగన్ ఎఫెక్ట్ : తెరపైకి ప్రత్యేక ఆంధ్రా…

151 స్థానాల్లో జగన్ పార్టీని గెలిపించి అసెంబ్లీకి పంపిస్తే… జగన్ మంచి సీఎంగా పేరు తెచ్చుకుంటానని చెప్పి, మొదట్లో మంచివాడిగా పేరు తెచ్చుకొని ఆ తరువాత జగన్ తన విశ్వరూపం చూపిస్తున్నాడు. మంచి వాడిగా పేరు తెచ్చుకుంటా అని చెప్పిన జగన్ కొన్నాళ్ళు మంచిగానే ఉండి… ఆ తరువాత హడావుడి చేయడం మొదలుపెట్టాడు. శీతాకాల అసెంబ్లీ చివరి రోజున జగన్ అసెంబ్లీలో మాట్లాడిన మాటలు ప్రజల మధ్య విద్వేషాలు రేపాయి. 2013 నుంచి ఆంధ్రప్రదేశ్ ప్రజలు యునైటెడ్ ఆంధ్రప్రదేశ్ కోసం పోరాం చేశారు.

ఉమ్మడి ఆంధ్రప్రదేశ్ ఉంచాలని, లేదంటే ఉద్యమం చేస్తామని చెప్పిన ఆంధ్రప్రదేశ్ ప్రజలు చెప్పినట్టుగానే పోరాటం చేశారు. కానీ, తెలంగాణను చేజార్చుకోవాల్సి వచ్చింది. సరే ఆంధ్రప్రదేశ్ ఉన్నది కదా సరిపెట్టుకుందాం అనుకుంటే, ఇప్పుడు ఆంధ్రప్రదేశ్ రాజధాని ఎఫెక్ట్ పడింది. గత ప్రభుత్వం అమరావతిని ఆంధ్రప్రదేశ్ రాజధానిగా గుర్తించి కొన్ని కట్టడాలు నిర్మించారు. ప్రభుత్వం మారింది. ఆరు నెలలపాటు కామ్ గా ఉన్న వైకాపా ప్రభుత్వం ఇప్పుడు ఆలోచనలు మార్చుకున్నది.

ఆంధ్రప్రదేశ్ రాజధానిగా అమరావతి ఒక్కటి సరిపోదని చెప్పి ఏకంగా మూడు రాజధానుల ప్రతిపాదన తీసుకొచ్చింది. మూడు రాజధానుల ప్రకటన అందరికి నచ్చుతుందని అనుకున్నారు. బెడిసికొడుతుందని వైకాపా భావించలేదు. మూడు రాజధానుల ప్రకటనతో అమరావతి ప్రాంతం అట్టుడికిపోతోంది. పశ్చిమగోదావరి, కృష్ణా, గుంటూరు, ప్రకాశం, నెల్లూరు జిల్లాలకు చెందిన లాయర్లు విజయవాడలోని కృష్ణా నది బ్రిడ్జీపై ఆందోళన చేసేందుకు సిద్ధం అయ్యారు.

అయితే, దీనిని అడ్డుకోవడానికి ప్రభుత్వం సిద్ధం అయ్యింది. ముందస్తు చర్యల్లో భాగంగా కృష్ణా నది వంతెనను మూసేసింది. పోలీసులు ఆ ప్రాంతంలో భారీగా మోహరించారు. లాయర్లను అడ్డుకుంటున్నారు. ఇక విజయవాడ ఎంపీ కేశినేని నానిని పోలీసులు ముందస్తుగా హౌస్ అరెస్ట్ చేశారు. దీంతో తెలుగుదేశం పార్టీ దీనిని చీకటిరోజుగా అభివర్ణిస్తూ ఆందోళనకు దిగింది. ప్రస్తుతం విజవాడలో ఉద్రిక్తకరమైన పరిస్థితులు ఏర్పడ్డాయి. ఇది ఇక్కడితో ఆగేలా కనిపించడం లేదు.

ఒకవేళ జగన్ ప్రభుత్వం మూడు రాజధానుల నిర్ణయాన్ని వెనక్కి తీసుకోకుంటే భవిష్యత్తులో పశ్చిమ గోదావరి, కృష్ణ, గుంటూరు, ప్రకాశం, నెల్లూరు జిల్లాలతో కూడిన ప్రత్యేక ఆంధ్రా కోసం ఉద్యమం జరిగేలా కనిపిస్తోంది. ఒకవేళ ఈ ఉద్యమం కనుక తెరపైకి వస్తే… 13 జిల్లాల ఆంధ్రప్రదేశ్ కాస్త మూడు రాష్ట్రాలుగా విడిపోతుంది. ఇదే జరిగితే అనేక ఇబ్బందులు వచ్చే అవకాశం ఉంటుంది.