జగన్‌కి గుడి కట్టడమేంటి.? హిందువుడిగా ఖండిస్తున్నానన్న రఘురామ!

‘వైఎస్‌ జగన్‌ మోహన్‌రెడ్డికి ఓ ఎమ్మెల్యే గుడి కట్టడమేంటి.? వైఎస్‌ జగన్‌ మోహన్‌రెడ్డి మీద సదరు ఎమ్మెల్యేకి మరీ అంత భక్తి ఎక్కువైపోతే, ఎంచక్కా చర్చిని నిర్మించుకోవచ్చు..’ అంటూ పశ్చిమగోదావరి జిల్లా గోపాలపురంలో ఎమ్మెల్యే తలారి వెంకట్రావు, వైఎస్‌ జగన్‌ మోహన్‌రెడ్డికి స్థానిక వైసీపీ నేతలు కట్టనున్న గుడికి శంకుస్థాపన చేసిన విషయం విదితమే. ‘జీవించి వున్న వ్యక్తికి గుడి కట్టడమేంటి.?’ అని అంతా ముక్కున వేలేసుకుంటోంటే, అధినేత మెప్పు కోసం మరికొందరు వైసీపీ నేతలు ఇదే బాట పట్టనున్నారంటూ సోషల్‌ మీడియా వేదికగా కుప్పలు తెప్పలుగా గాసిప్స్‌ ప్రచారంలోకి వచ్చాయి.

ఇక, ఈ విషయమై వైసీపీ ఎంపీ రఘురామకృష్ణరాజు సంచలన వ్యాఖ్యలు చేశారు. ‘గుడి, దేవాలయం అన్న మాటలు హిందూ మతానికి సంబంధించినవి. వైఎస్‌ జగన్‌ మీద నాకూ అభిమానం, ప్రేమ, గౌరవం వున్నాయి. కానీ, హిందువుడిగా నేను ఈ చర్యల్ని వ్యతిరేకిస్తున్నాను. కావాలంటే చర్చి కట్టుకోండి..’ అంటూ రఘురామకృష్ణరాజు చేసిన వ్యాఖ్యలిప్పుడు పెను సంచలనంగా మారాయి.

‘ఓ ప్రజా ప్రతినిది¸ ఇలాంటి చర్యలకు ఒడిగట్టడం అస్సలేమాత్రం సబబు కాదు. ఆయనకు ప్రేమ వుంటే, ఇంట్లో వైఎస్‌ జగన్‌ ఫొటో పెట్టుకుని పూజలు చేసుకోవచ్చు, ప్రార్థనలు చేసుకోవచ్చు. అంతే తప్ప, హిందూ మతాన్ని కించపర్చేలా వ్యవహరించడం సమర్థనీయం కాదు..’ అని రఘురామకృష్ణంరాజు వ్యాఖ్యానించారు.

‘ఇలాంటోళ్ళను ప్రోత్సహించడమంటే ప్రజలకు తప్పుడు సంకేతాలు ఇచ్చినట్లవుతుంది. ముఖ్యమంత్రి వైఎస్‌ జగన్‌ వెంటనే ఈ విషయంపై స్పందించాలి. ప్రజల గుండెల్లో గుడి కట్టుకోవాలి తప్ప. ఇలా పార్టీ నేతలతో గుడులు కట్టించుకుంటే, అది మీ స్థాయికి తగదు..’ అని ముఖ్యమంత్రి వైఎస్‌ జగన్‌ని ఉద్దేశించి రఘురామకృష్ణ మండిపడ్డారు.

ఇదిలా వుంటే, రాజధానిని అమరావతిలోనే కొనసాగించాలనే డిమాండ్‌తో ఆందోళనలు చేపడుతోన్న అమరావతి ప్రాంత మహిళా రైతులు ఇటీవల రోడ్డుపై మోకాళ్ళపై నిలబడి న్యాయస్థానాల్ని వేడుకొంటున్న వైనంపై సోషల్‌ మీడియాలో వైసీపీ మద్దతుదారులు జుగుప్సాకరమైన వ్యాఖ్యలు చేయడాన్ని రఘురామకృష్ణరాజు తీవ్రంగా తప్పు పట్టారు. ‘ఆడపడుచుల్ని కుక్కలతో పోల్చుతారా.? వేట కుక్కలై మన ప్రభుత్వాన్ని తరిమికొట్టే శక్తి ఆ మహిళలకు వుంది..’ అంటూ హెచ్చరించారు రఘురామకృష్ణరాజు.

అమరావతి కోసం ఉద్యమిస్తూ ప్రాణాలు కోల్పోయనివారిని త్వరలో పరామర్శిస్తాననీ, గతంలో వైఎస్‌ రాజశేఖర్‌రెడ్డి మరణాన్ని తట్టుకోలేక ప్రాణాలు కోల్పోయినవారిని ఓదార్చేందుకు వైఎస్‌ జగన్‌ ఓదార్పు యాత్ర చేసిన దరిమిలా, ఆ స్ఫూర్తితో తాను అతి త్వరలో అమరావతి ప్రాంతానికి వెళతానని చెప్పారు వైసీపీ ఎంపీ రఘురామకృష్ణరాజు.