ఏపీలో ‘పవర్’ కట్.! ఇన్వర్టర్ లేదా పవన్ కళ్యాణ్.?

జనసేన అధినేత పవన్ కళ్యాణ్, ఆంధ్రప్రదేశ్‌లోని తమ పార్టీ కార్యాలయంలో మీడియా ప్రతినిథులతో సమావేశమయ్యారు.. మీడియా ప్రతినిథులు అడుగుతున్న ప్రశ్నలకు సమాధానాలిస్తున్నారు. సరిగ్గా, అదే సమయంలో ‘పవర్’ పోయింది. చిత్రమేంటంటే, రాష్ట్రంలో పరిశ్రమలకు కరెంటు కోతల్ని ఎత్తివేస్తున్నామనీ, రాష్ట్రంలో అసలు ఎక్కడా విద్యుత్ సమస్యలు లేవనీ ప్రభుత్వం ప్రకటించగా, జనసేన పార్టీ రాష్ట్ర కార్యాలయంలో, పవన్ కళ్యాణ్ మీడియా ప్రతినిథులతో సమావేశమైన సమయంలో ‘పవర్’ పోయింది.

మొబైల్ ఫోన్లలోని ఫ్లాష్ లైట్ ఆధారంగా ఆ మీడియా ప్రతినిథులతో సమావేశం కొనసాగిందనుకోండి.. అది వేరే సంగతి. పవన్ మాట్లాడుతుండగా, పవర్ పోవడంతో.. ‘ఇదీ రాష్ట్రంలో పరిస్థితి..’ అంటూ పవన్ కళ్యాణ్ వేసిన సెటైర్ వైరల్ అయ్యింది. దాంతో, అధికార పార్టీకి చెందిన నెటిజన్లకు ఒళ్ళు మండిపోయింది.

‘ఇంత పెద్ద పార్టీ కార్యాలయం పెట్టుకుని ఇన్వర్టర్ లేకపోవడమేంటి.? జనరేటర్ పని చెయ్యడంలేదా.?’ అంటూ చిత్రమైన రీతిలో బులుగు కూలీలు సోషల్ మీడియాలో ప్రశ్నలు సంధించేశారు. దానికి, జనసైనికులు కూడా కౌంటర్ ఎటాక్ అంతే స్థాయిలో ఇచ్చారనుకోండి.. అది వేరే విషయం.

పార్టీ కార్యాలయంలో పవర్ జనరేటర్ అందుబాటులో వుందా.? లేదా.? ఇన్వర్టర్ సంగతేంటి.? ఇవన్నీ ఆ పార్టీ కార్యాలయానికి సంబంధించిన వ్యవహారాలు. అసలు ఎక్కడా విద్యుత్ సమస్యలే లేవని ప్రభుత్వం చెబుతోంటే, రాజధాని అమరావతి పరిధిలో, మంగళగిరి జనసేన పార్టీ కార్యాలయంలో కరెంటు పోవడమేంటి.?

రాష్ట్రంలో విద్యుత్ కోతల తీవ్రత చాలా ఎక్కువగా వుందన్నది బహిరంగ రహస్యం. పరిశ్రమలకు ప్రభుత్వమే పవర్ హాలీడే ప్రకటించింది కూడా. వైసీపీ ఎమ్మెల్యే ఒకరు విద్యుత్ ఛార్జీల పెంపు, కరెంటు కోతలకి చెప్పిన కారణం ‘రష్యా, ఉక్రెయిన్ యుద్ధం’. మళ్ళీ ప్రభుత్వమేమో, అసలు విద్యుత్ కోతలే లేవని చెబుతుండడాన్ని ఎలా అర్థం చేసుకోవాలి.?