జస్ట్ ఆస్కింగ్: పెట్రో దోపిడీకి ఇదా సమయం.?

జీఎస్టీ పరిధిలోకి పెట్రోల్, డీజిల్ వచ్చేస్తాయంటూ మీడియా చేసిన హంగామా అంతా ఇంతా కాదు. ప్రత్యేక హోదా విషయంలోనూ ఇదే ‘మీడియా దందా’ నడిచింది. ఔను, నరేంద్ర మోడీ ప్రధాని అయితే.. ఆంధ్రప్రదేశ్ రాష్ట్రానికి ప్రత్యేక హోదా వస్తుందంటూ నానా రకాల ప్రచారమూ చేశారు. చివరికి ఏమయ్యింది.? జీఎస్టీ విషయంలోనూ అదే జరిగింది.

జీఎస్టీ కౌన్సిల్ సమావేశం జరిగింది. ఆ సమావేశంలో పెట్రోల్, డీజిల్‌లను జీఎస్టీ పరిధిలోకి తీసుకురావడం అనే అంశంపై చర్చించారు. చివరికి, ‘ఇది సమయం కాదు’ అని తేల్చారు. ఆ విషయాన్ని స్వయంగా కేంద్ర ఆర్థిక మంత్రి నిర్మలా సీతారామన్ సెలవిచ్చారు. ‘అంతన్నాడింతన్నాడే గంగరాజు..’ అన్నట్టు తయారైంది పరిస్థితి.

కరోనా నేపథ్యంలో దేశ ప్రజలు ఆర్థికంగా చితికిపోయి వున్నారు. అన్ని రంగాలూ కుదేలయ్యాయి. ఇలాంటి సమయంలో ధరల భారం సామాన్యుడ్ని మరింతగా నాశనం చేస్తుందన్న కనీసపాటి ఇంగితం కూడా పాలకుల్లో లేదు. రాష్ట్రాల్లోనూ, కేంద్రంలోనూ ఇదే దుస్థితి. పెట్రో ధరలు అంటే, ఒక్క పెట్రోల్ మరియు డీజిల్ మాత్రమే కాదు.. పెట్రో ధరలతో అన్ని ధరలూ ముడిపడి వుంటాయి. ఎందుకంటే, ప్రతి వస్తువు ధరకీ రవాణాతో లింకు గనుక.

ఒక్కమాటలో చెప్పాలంటే ఈ రోజుల్లో పెట్రోల్, డీజిల్ అంటే.. నిత్యావసర వస్తువల ధరల లెక్క. కానీ, ఆ సోయ.. కేంద్ర, రాష్ట్ర ప్రభుత్వాలకు లేదు. పెట్రో పన్నుల ద్వారా ఖజానా నింపుకోవడానికి అలవాటుపడ్డ ప్రభుత్వాలు, అలా నిండిన ఖజానాని తమ పొలిటికల్ పబ్లిసిటీకి ఉపయోగపడే సంక్షేమ పథకాలకు ఖర్చుపెట్టడానికి అలవాటు పడ్డ ప్రభుత్వాలు.. సామాన్యుడికెందుకు ఊరట కలిగిస్తాయి.? అవకాశమే లేదు. ఇప్పుడున్న పరిస్థితుల్లో ఇది సాధ్యం కాదంటూ కేంద్ర ఆర్థిక మంత్రి సింపుల్‌గా తేల్చేశారు.. రాష్ట్రాల ఆర్థిక మంత్రులు ఇదే అభిప్రాయాన్ని వ్యక్తం చేశారట. ఇదో పెద్ద కామెడీ.

రాష్ట్రాల్ని అడిగి కేంద్రం అన్ని పనులూ చేస్తోందా.? కేరళ హైకోర్టు, పెట్రో ఉత్పత్తుల్ని జీఎస్టీ పరిధిలోకి తీసుకొచ్చే అంశాన్ని పరిశీలించాలని కేంద్రానికి సూచించడంతో, కేంద్రం ఈ దిశగా జీఎస్టీ కౌన్సిల్ సమావేశంలో చర్చించింది. ‘పరిశీలించాం, కుదరదు..’ అని తేల్చేసిందన్నమాట కేంద్రం ఇప్పుడు.