కర్నూలు పర్యటనలో పవన్‌: పోటెత్తిన జనసైనికులు

కర్నూలు జిల్లా నంద్యాల సిట్టింగ్‌ ఎంపీ ఎస్పీవై రెడ్డి ఇటీవల అనారోగ్యంతో కన్నుమూసిన సంగతి తెల్సిందే. ఎస్పీవై రెడ్డి, జనసేన తరఫున నంద్యాల నుంచే మరోసారి ఎంపీగా బరిలోకి దిగారు.. అదీ జనసేన అభ్యర్థిగా. జనసేన పార్టీలో ఎస్పీవై రెడ్డి చేరికతో, కర్నూలు జిల్లాలో పార్టీకి కొత్త ఊపు వచ్చిందని అప్పట్లో పార్టీ శ్రేణులు భావించాయి. పోలింగ్‌ తర్వాత, ఎస్పీవై రెడ్డి ఆసుపత్రిలో వైద్య చికిత్స పొందుతూ ప్రాణాలు కోల్పోయారు.

ఈ నేపథ్యంలో ఎస్పీవై రెడ్డి కుటుంబాన్ని పరామర్శించేందుకు కర్నూలు వెళ్ళారు పవన్‌కళ్యాణ్‌. పవన్‌ కళ్యాణ్‌ కర్నూలు టూర్‌కి జనసైనికులు పోటెత్తారు. ఎస్పీవై రెడ్డి సమాధి వద్ద ఘన నివాళులర్పించిన జనసేనాని పవన్‌కళ్యాణ్‌, ఆయన కుటుంబ సభ్యుల్ని పరామర్శించారు. ఎస్పీవై రెడ్డి కుమార్తెతోపాటు, అల్లుడితో పవన్‌ మాట్లాడారు. విదేశీ పర్యటనలో వుండడం వల్ల ఎస్పీవై రెడ్డి అంత్యక్రియలకు హాజరు కాలేకపోయినట్లు పవన్‌కళ్యాణ్‌, వారికి తెలిపారు.

ఇదిలా వుంటే, నంద్యాల పార్లమెంటు పరిధిలో ఎస్పీవై రెడ్డి కుటుంబానికి వున్న మంచి ఇమేజ్‌ కారణంగా కొంత ఆందోళనకు గురైన టీడీపీ అధినేత చంద్రబాబు, ఎన్నికల ప్రచారం సందర్భంగా ‘పోటీ నుంచి తప్పుకుంటే ఎమ్మెల్సీ పదవి ఇస్తాం..’ అంటూ ప్రకటించినా, ఎస్పీవై కుటుంబం లైట్‌ తీసుకుంది. 2014 ఎన్నికల్లో వైఎస్సార్‌ కాంగ్రెస్‌ పార్టీ నుంచి ఎస్పీవై రెడ్డి నంద్యాల ఎంపీగా గెలుపొందారు. అయితే, పార్టీ అధినేత వైఎస్‌ జగన్‌ తీరు నచ్చక, వెంటనే వైసీపీకి గుడ్‌ బై చెప్పి, తెలుగుదేశం పార్టీలో చేరారు.

మరోపక్క, తాజా ఎన్నికలకు సంబంధించి చంద్రబాబు చివరి నిమిషం వరకు సీటు ఖరారు చేయకుండా, ఎస్పీవై రెడ్డినీ, ఆయన కుటుంబాన్నీ అవమానపర్చారు. ఈ నేపథ్యంలోనే ఎస్పీవై రెడ్డి అనూహ్య నిర్ణయం తీసుకుని, జనసేన పార్టీలో చేరారు. ప్రస్తుతం నంద్యాల పార్లమెంటు పరిధిలో జనసేన ఓటు బ్యాంకు గణనీయంగానే వుండబోతోందనీ, పవన్‌కళ్యాణ్‌కి వున్న ఇమేజ్‌కి ఎస్పీవై రెడ్డి ఫాలోవర్స్‌ అదనంగా తోడయ్యారని జనసేన వర్గాలు అంచనా వేస్తున్నాయి.

కాగా, పవన్‌కళ్యాణ్‌ పర్యటన సందర్భంగా కర్నూలు జిల్లా జనసేన పార్టీ వర్గాల్లో జోష్‌ కన్పించింది. అయితే, వచ్చింది పరామర్శ కోసం గనుక పార్టీ శ్రేణులు సంయమనం పాటించాలంటూ పదే పదే జనసైనికులకు జనసేనాని హితబోధ చేశారు.