అవి ‘పవర్’ఫుల్ వ్యాఖ్యలే.. పవన్ విరాళాల వ్యాఖ్యలపై సానుకూల చర్చ

రాజకీయ నేతలు, ఇతర ధనిక సమాజం విరాళాలు ఇచ్చే విషయంలో అనుసరిస్తున్న వైఖరి గురించి జనసేన అధినేత పవన్ కల్యాణ్ చేసిన వ్యాఖ్యలపై సర్వత్రా చర్చ జరుగుతోంది. పవన్ చెప్పింది నూటికి నూరుపాళ్లు నిజమని చాలామంది అభిప్రాయపడుతున్నారు. వీరిలో అధికార పార్టీ వైఎస్సార్ సీపీ శ్రేణులు కూడా ఉండటం విశేషం.

నిజానికి విరాళం ఇవ్వడం అనేది ఆయా మనుషుల తత్వాలను బట్టి ఉంటుంది. బలవంతంగా ఇచ్చేది విరాళం కాదు. అందరూ కర్ణుడిలా దానగుణం చూపించలేరు. కొందరు లేమిలోనూ దానం చేయడానికి ప్రయత్నిస్తుంటారు. మరికొందరు ఎంత ఉన్నా పైసా విదల్చరు. ఇక్కడ పవన్ ప్రస్తావించింది ఈ రెండో రకానికి చెందినవారినే.

రియల్ ఎస్టేట్, పారిశ్రామిక రంగాల్లో కోట్లకు కోట్లు సంపాదించినవారు చాలామంది ఉన్నారు. ఇక రాజకీయ నాయకుల సంపాదన గురించి ప్రత్యేకంగా చెప్పక్కర్లేదు. వీరిలో ఎంతమంది ముందుకొచ్చి తమ దాతృత్వాన్ని చాటుకున్నారన్నదే జనసేనాని ప్రశ్న. ఎన్నికల సమయంలో నోట్లు వెదజల్లుతుంటారు. ఓటుకు రూ. వెయ్యి, రూ.2వేలు అంటూ రేటు ఫిక్స్ చేసి కోట్లకు కోట్లు ఖర్చు పెడతారు. అధికారంలోకి వచ్చిన తర్వాత అంతకు పదింతలు సంపాదించేందుకు సమయం మొత్తం కేటాయిస్తారు. ఇదంతా కాకుండా ప్రజలు కష్టాల్లో ఉన్నప్పుడు వారికి అండగా ఉంటే.. ఎన్నికల్లో వారే గెలిపిస్తారు కదా అనేది పలువురు సంధిస్తున్న ప్రశ్న.

ఇందులోనూ నిజం లేకపోలేదు. ‘మావోడి దగ్గర బోలెడు డబ్బుంది. మొన్నటి ఎన్నికల్లో చాలా ఖర్చుపెట్టాడు. కరోనా టైంలో పైసా కూడా తీయలేదు. ఇలాంటప్పుడు నలుగురికీ సాయం చేస్తే మావోడి పరపతి ఎంతగానో పెరిగేది. కానీ ఏం చేస్తాం’ అంటూ అధికార పార్టీకి చెందిన ఓ నాయకుడి అనుచురుడు నిట్టూర్పు విడిచారు.

పవన్ చెప్పిందాంట్లో నూటికి నూరుపాళ్లు నిజం ఉందని ఆయన అంగీకరించారు. బిల్ గేట్స్, వారెన్ బఫెట్ తరహాలో ఉన్నఆస్తిలో సింహ భాగం పంచేయమని ఎవరూ చెప్పరు. కానీ ప్రజలు కష్టాల్లో ఉన్నప్పుడు ఆదుకునే చేయిని వారు ఎన్నటికీ మరచిపోరు. పైగా అలాంటివాడే నాయకుడు అనిపించుకుంటారు. కరోనా కష్టకాలంలో సినీ నటుడు సోనూసూద్ చేసిందదే. అందుకే ఆయనకు అంత పేరొచ్చింది. సినిమాల్లో విలన్ గా ఉన్న ఆయన.. నిజజీవితంలో హీరో అయిపోయారు. మరి పవన్ మాటలతో కొంతమందిలోనైనా మార్పు వస్తే సంతోషమే కదా?