పాక్ ఒక్క తూటా పేలిస్తే.. పీఓకే పని అయిపోయినట్టే!

జమ్మూ కాశ్మీర్ పరిణామాలతో కుతకుతలాడిపోతున్న పాకిస్తాన్ ప్రతీకారం తీర్చుకోవాలని పరితపిస్తోంది. కాశ్మీర్ వ్యవహారం భారత్ అంతర్గతమని అందరూ చెబుతున్నా దాయాది చెవికి ఎక్కడంలేదు. అటు అమెరికా వార్నింగ్ ఇచ్చినా.. ఇటు రష్యా కాదు పొమ్మన్నా.. చివరకు చైనా సైతం తెలివిగా తప్పుకున్నా.. పొరుగుదేశానికి పరిస్థితులు అర్థం కావడంలేదు. ఎలాగైనా భారత్ ను దెబ్బ కొట్టాలంటూ పాక్ ప్రభుత్వంపై ఒత్తిడి పెరుగుతోంది. వాస్తవానికి భారత్ కూడా అందుకోసమే ఎదురు చూస్తోంది.

విచక్షణ, వివేకం మరిచి పాకిస్తాన్ కయ్యానికి కాలు దువ్విందంటే చాలు.. మొత్తం వ్యవహారాన్ని చక్కబెట్టేయడానికి భారత్ సన్నద్ధంగా ఉంది. ఇప్పటికే తనపై వస్తున్న ఒత్తిడి తట్టుకోలేక, ఏం చేయాలో తెలియక పాక్ ప్రధాని ఇమ్రాన్ ఖాన్ లడఖ్ సరిహద్దుల్లో ఎఫ్-16 యుద్ధ విమానాలను మోహరించాడు. తదుపరి అంకంలో భారత భూభాగంపై పొరుగుదేశ యుద్ధ విమానాలు నాలుగు బాంబులు వేస్తే చాలు.. దాయాది భరతం పట్టడానికి మన సేనలు సిద్దంగా ఉన్నాయి. పనిలో పనిగా పాక్ ఆక్రమిత కాశ్మీర్ ను తిరిగి స్వాధీనం కూడా చేసుకుంటాయి. ఇందుకు సంబంధించి వ్యూహాలు, ఏర్పాట్లు చకచకా సాగిపోతున్నాయి.

వాస్తవానికి కాశ్మీర్ విభజన చేయడానికి ముందుగానే ఈ అంశాలన్నింటిపై కేంద్రం పూర్తి స్తాయిలో కసరత్తు చేసింది. ఏ పరిస్థితి ఎదురైతే ఎలా వ్యవహరించాలో పక్కాగా స్కెచ్ వేసి పెట్టుకుంది. పాక్ కవ్విస్తే చాలు.. పీవోకే వ్యవహారాన్ని చక్కబెట్టేందుకు అవసరమైన ప్రణాళికలతో సిద్ధంగా ఉంది. ఈ విషయాలన్నీ అర్థమయ్యాయో ఏమో.. పాక్ విదేశాంగ మంత్రి ఖురేషీయే స్వయంగా తమ దేశ ప్రజలకు హితబోధ చేశారు. కాశ్మీర్ వ్యవహారంలో భ్రమల్లో బతకొద్దని పేర్కొన్నారు. ఈ వ్యవహారంలో ముస్లిం దేశాలు సహా ఏ ఒక్క దేశమూ మనకు మద్దతుగా రాదనే సంగతి గుర్తించాలని సూచించారు. మొత్తమ్మీద పాక్ కు అనుభవం కాకుండానే తత్వం బోధపడినట్టుంది. అసలే తీవ్రమైన అప్పులతో ఆర్థిక సంక్షోభంలో కూరుకుపోయిన పాకిస్తాన్.. భారత్ పై యుద్దానికి దిగే సాహసం చేయకపోవచ్చు.