మహాభారతం మొదలుపెట్టాలి.. కానీ..

దర్శక ధీరుడు ఎస్ ఎస్ రాజమౌళి తన కలల ప్రాజెక్ట్ మహాభారతం అని ఇప్పటికే దాదాపు ఐదేళ్ల నుండి పలు వేదికలపై, ఇంటర్వ్యూలలో తెలిపాడు. అయితే మొదట ప్రకటన చేసినప్పుడు మహాభారతం చేయడానికి ప్రస్తుతం తన వద్ద ఉన్న శక్తి సరిపోదని, దానికి మరో పదేళ్లు పడుతుందని అన్నాడు. ఇలా చెప్పి ఐదేళ్లు కావొస్తోంది.

ఇన్నాళ్లూ ఈ సినిమా గురించి చర్చ లేదు కానీ ఇటీవలే నార్త్ జనాలు రాజమౌళి మేక్ రామాయణ అంటూ ఒక ట్రెండ్ మొదలుపెట్టడంతో తన కలల ప్రాజెక్ట్ మహాభారతం మళ్ళీ తెరపైకి వచ్చింది. దీంతో ప్రస్తుతం లాక్ డౌన్ కారణంగా రాజమౌళి ఇంట్లోనే ఉంటుండడంతో మహాభారతం పనులు ఏమైనా మొదలుపెట్టాడా అని అందరూ ఆలోచిస్తున్నారు.

దీనిపై రాజమౌళి వివరణ కూడా ఇచ్చాడు. మహాభారతం పనులు మొదలుపెట్టాలి. అయితే అదేదో ఇప్పుడు కొంచెం ఖాళీ దొరికింది కదా అని మొదలుపెట్టే ప్రాజెక్ట్ కాదు. దాని మీదనే కొన్ని నెలల పాటు వర్క్ చేయాలి. ప్రస్తుతం ఉన్న కమిట్మెంట్లతో ఆ పని చేయలేను. సో మహాభారతం మొదలుపెట్టడానికి కనీసం మరో నాలుగైదేళ్లు పడుతుందని క్లారిటీ ఇచ్చాడు జక్కన్న.

ప్రస్తుతం ఆర్ ఆర్ ఆర్ సినిమా పనులతో రాజమౌళి బిజీగా ఉన్నాడు. షూటింగ్ కు అనుమతి లభించిన వెంటనే బ్యాలన్స్ పార్ట్ ను పూర్తి చేసి వీలైనంత త్వరగా సినిమాను విడుదల చేయాలనీ భావిస్తున్నాడు. ఆర్ ఆర్ ఆర్ తర్వాత మహేష్ బాబు సినిమా ఉంటుందని ఇప్పటికే ప్రకటించాడు. ఆ సినిమా పూర్తి కావడానికి మరో రెండేళ్లు పడుతుంది. మహేష్ సినిమా పూర్తయ్యాక మహాభారతం గురించి ఆలోచన చేస్తాడేమో చూడాలి.